Орусиянын тышкы иштер министрлиги Евробиримдиктин орус басылмаларына жана маалымат каналдарына карата чектөөлөрүнө жооп кайтаруу чараларына байланыштуу билдирүү таратты.
Анда Москва жооп катары европалык 15 ЖМКга чектөө киргизүү чечимин 16-февралдагы каршы санкциялар пакетинин алкагында кабыл алынганын билдирди.
Маалымат Орусиянын тышкы иштер министрлигинин расмий сайтына жарыяланды.
“Евробиримдиктин сегиз орус басылмаларына жана маалымат каналдарына (Евразия Daily, Фондск, Лента, News Front, Rubaltic, South Front, Стратегиялык маданият фонду жана РИК Красная Звезда федералдык мамлекеттик бюджеттик мекемеси) каршы акыркы чектөөлөрүнө жооп катары Орусия тарап 16-февралдагы каршы санкциялар пакетинин алкагында кабыл алынган. Орусия Федерациясынын аймагынан жалган маалымат таратууга катышкан блокко мүчө-мамлекеттердин он беш ЖМКсынын веб-ресурстарына кирүүгө чектөөлөр киргизилди”, – деп айтылат маалыматта.
Мындан тышкары, орусиялык жалпыга маалымдоо каражаттарына багытталган тыюуга жана негизсиз чектөөлөргө, андан тышкары саясий мүнөздөгү куугунтуктун башка формаларына орус тарап тиешелүү жооп берери расмий Брюсселге жана Евробиримдикке мүчө мамлекеттердин борборлоруна эскертилгенин кошумчалаган.
Эгер орусиялык басылмаларга коюлган чектөөлөр алынса, Москва өз чечимин кайра карап чыгат.
Эскерте кетсек, быйыл февраль айында Европа Биримдиги 16-санкция пакетинин алкагында бир катар басылмаларга чектөө киргизген.
РИА новостинин жазганына караганда, Батыштагы орусиялык маалымат каражаттары менен кырдаал акыркы жылдары барган сайын оорлоп баратат.
Агенттик билдиргендей, 2016-жылы Европарламент резолюция кабыл алып, аларга каршы туруу зарылдыгын жана негизги коркунуч катары Sputnik менен RT телеканалдарын атаган.
Евробиримдик ошондой эле орусиялык маалымат каражаттарын көрсөтүүгө тыюу салып, сотко же улуттук жөнгө салуучу органдарга кайрылбастан чечим кабыл алган.


















