“Түркмөнстан – Ооганстан – Пакистан – Индия” газ куурунун узундугу 1 миң 840 чакырымды түзөт. Долбоор түркмөн газын Ооганстан аркылуу Пакистан менен Индиянын керектөөчүлөрүнө жеткирүүнү көздөйт.
Ооганстанда “Түркмөнстан-Ооганстан-Пакистан-Индия” (TAPI) газ куурунун курулушу башталды. Бул тууралуу талибдердин расмий өкүлү Забихулла Мужахид билдирди, деп жазат ArianaNews.
Мужахиддин айтымында, долбоорду ишке ашыруу үчүн керектүү техникалык жабдуулар Ооганстан менен Түркмөнстандын чек ара аймагына жеткирилип, практикалык иштер башталды.
Тема боюнча
“Долбоордун ар кайсы бөлүктөрүндө көп сандагы адистер иштеп жатат. Анын биринчи фазасы жакынкы эки жылдын ичинде бүтөт”, – деди Мужахид.
Эксперттердин айтымында, TAPI аймактын экономикасын өнүктүрүүдө маанилүү ролду ойнойт. Атап айтканда, курулуш аяктагандан кийин:
12 миң адам жумуш менен камсыз болот;
Ооганстандын жылдык кирешеси 1 миллиард долларга көбөйөт.
TAPI долбоору жөнүндө
Узундугу: 1840 км.
Маршрут: Түркмөнстандагы Галкыныш газ кенинен Афганистан аркылуу Пакистанга жана Индияга.
Баасы: Долбоордун болжолдуу баасы 10 миллиард долларды түзөт.
Курулуш этаптары: Түркмөнстандын аймагында узундугу 214 км. болгон участоктун курулушу аяктады.
Кийинки этапта Ооганстан аркылуу куурду тартуу иштери турат.
TAPI долбоору аймактагы экономикалык кызматташтыкты, чек ара соодасын жана энергетикалык ресурстарды натыйжалуу байланыштырууну бекемдөөгө багытталган.
Сүрөт: Ariana News
