Омандын муфтийи Шейх Ахмед бин Хамад Аль-Халили Америка университеттериндеги студенттердин Израилге каршы нааразылык акцияларын колдоду. Бул тууралуу “Аlmanar” агенттиги жазды.
“Биз Америка жана Европа университеттеринин студенттери менен мугалимдеринин Аль-Аксадагы баскынчы бийликтер тарабынан жасалган зулумдукту, өзгөчө Газа тилкесиндеги геноцидди айыптаган нааразычыылк акцияларын кубаттайбыз”, – деди Аль-Халили.
Ал студенттердин мындай эр жүрөктүү аракеттерин колдой турганын айтып, кээ бир өлкөлөр бул баскынчы режимдин жанында турууну токтотушу үчүн мындай акциялар бардык университеттерди камтыйт деп үмүт артарын билдирди.
Ошондой эле муфтий бул нааразылык акциялары баскынчы душман менен компромисске ашынгандар үчүн сабак деп белгиледи.
Американын алдынкы университеттеринин кампустарында Израилге каршы демонстрациялар уланып жатат. Учурда Палестинаны колдоо жана Израилге каршы нааразычылык акциялары 23 университетте жана колледжде уланууда, алардын көпчүлүгү өлкөнүн элиталык окуу жайларынын катарына кирет: Массачусетс технологиялык институту, Колумбия университети, Гарвард, Йел, Принстон (акыркы төртөө атактуу Плюща лигасына кирет), Мичиган университети, Беркли ж.б.
Студенттер чатыр лагерлерин куруп, митингдерди өткөрүшүүдө. Алар Газадагы согушта каза болгондордун саны өсүп жаткандыгына байланыштуу университеттердин жетекчилигинен Израиль менен бардык кызматташтыкты токтотууну, Израиль менен каржылык байланышы бар ишканалар менен байланышты үзүүнү талп кылышууда.
Нааразылык акциялары көбүнчө Израилди колдогон студенттер менен кагылышуу жана полициянын кийлигишүүсү менен коштолууда. Америкалык Axios веб-сайты ишемби күнү кабарлагандай, бир жумадан ашык убакытта палестиналыктарды колдогон демонстрацияларда 600дөй адам камакка алынган.
Израилдин Газа тилкесиндеги согушу 7-октябрдан бери уланууда. Палестинанын Саламаттыкты сактоо министрлигинин акыркы маалыматтарына караганда, согуш учурунда 34 миңден ашуун палестиналык каза болуп, 78 миңге жакыны жарадар болду.
БУУнун палестиналык качкындарга жардам көрсөтүү агенттигинин (UNRWA) башкы комиссары Филипп Лазарини акыркы алты айда Газа тилкесинде каза болгон балдардын саны акыркы төрт жыл ичинде дүйнө жүзү боюнча кагылышууларда каза болгон балдардын санынан ашып кеткенин билдирди.















