Кыргызстандык мигранттардын акча которуулары өткөн жылга салыштырмалуу кыскарды.
Өлкөбүздүн Улуттук банкынын маалыматына караганда, чет мамлекеттерде иштеп жүргөн мекендештер 2023-жылдын июль айында мекенине 145,9 млн доллар которгон. Бул май айына караганда 17,9 млн долларга аз.
Которулган акчанын басымдуу бөлүгү Россияга туура келет (132.2 млн доллар). Экинчи орунда алыскы чет өлкөлөр турат. Улуттук банк башка өлкөлөрдөн 6 млн, АКШдан 4,5 млн, Түркиядан 1,7 млн доллар каражат которулганын билдирди.
Мигранттардын жыл башынан бери которгон акчасы 1 млрд 107,3 миллион долларды түздү. Бул өткөн жылдын ушул убактысына караганда 31,5 пайызга же 510,8 миллионго аз.
Ошол эле учурда июль айында жеке адамдар Кыргызстандан башка өлкөлөргө 30 млн доллар которушкан. Мында Россияга 28 млн доллар, алыскы өлкөлөргө 1,1 млн доллар которулган. Азыраак бөлүгү Казакстан менен башка өлкөлөргө чыгарылган.
Улуттук банктын маалыматына ылайык, жети айда жалпысынан 286,8 млн доллар акча Кыргызстандан башка өлкөлөргө которулган. Бул өткөн жылдын ушул убактысына караганда 188, 8 млн долларга аз.
Кыргызстандын 7 млн калкынын 1 миллиондон ашууну миграцияда жүрөт. Алардын басымдуу бөлүгү Россияда жана теңинен көбү орус жарандыгын алган.
