Атомдук энергия боюнча эл аралык агенттиктин (МАГАТЭ) башкы директору Рафаэль Гросси менен Ирандын тышкы иштер министри Аббас Аракчи телефон аркылуу сүйлөштү.
Сүйлөшүү учурунда МАГАТЭнин башчысынын Тегеранга сапары боюнча макулдашууга жетишилип, сапардын чоо-жайы такталууда.
Бул тууралуу Ислам Республикасынын Тышкы иштер министрлигинин маалымат кызматы билдирди.
“Сүйлөшүү учурунда Гросси иран тарапка Тегеранга сапар менен баруу өтүнүчү менен кайрылды, аны Ирандын тышкы иштер министри жактырды. Сапар жемиштүү болушу үчүн тараптар жакынкы аралыкта деталдарды талкуулашат”, — деп айтылат Ирандын Тышкы иштер министрлигинин Telegram-каналында жарыяланган билдирүүдө.
Текстте белгилегендей, сүйлөшүү учурунда Аракчи АКШнын Иранга каршы акыркы коркутууларын эске алуу менен Тегерандын “тынчтык максаттагы өзөктүк программасын чечкиндүү түрдө колдоо жана коргоо» ниетин көрсөткөн.
Рафаэль Гросси Иранга акыркы жолу былтыр ноябрда барган. Сапардын алкагында ал Ирандын Тышкы иштер министри Аббас Арагчи, Атомдук энергия боюнча уюмунун башчысы Мохаммад Эслами жана президенти Масуд Пезешкиан менен сүйлөшүүлөрдү өткөрүп, өлкөнүн өзөктүк программасына байланышкан маселелерди талкуулаган.
2015-жылы Иран менен АКШ, Франция, Германия, Улуу Британия, Кытай, Россия өзөктүк келишимге кол коюшкан. Ага ылайык, Тегеран уран байытууну чектеп, буга жооп катары Иранга киргизилген экономикалык санкциялар алына баштаган. Бирок 2018-жылдын май айында Дональд Трамп президент болуп турганда АКШ келишимден чыгып, Тегеранга каршы санкцияларды калыбына келтирген. Буга жооп катары Иран келишим боюнча милдеттенмелерин этап-этабы менен кыскартканын жарыялаган.
Үстүбүздөгү жылдын март айынын башында АКШнын президенти Дональд Трамп Ирандын жогорку лидери Али Хаменеиге кат жөнөткөнүн, анда ал өзөктүк программа боюнча Тегеран менен келишим түзүүнү кааларын белгилеген. Ал Вашингтон Ирандын өзөктүк маселесин чечүүнүн эки мүмкүн болгон жолун — аскердик же дипломатиялык жолду карап жатканын белгилеп, сүйлөшүүлөргө артыкчылык берерин баса белгилеген.
30-мартта Трамп Ирандын өзөктүк программасы боюнча сүйлөшүүлөрдө жылыш болбосо, эки жумадан кийин Иранга экинчи пошлиналарды киргизе турганын айткан. Ал эгер келишим толугу менен четке кагылса, Ислам Республикасы болуп көрбөгөндөй бомбалоого туш болорун айтып коркуткан.
Ирандын руханий лидери Али Хаменеи Трамптын коркутууларына жооп берип жатып, АКШнын аскерий кийлигишүү мүмкүнчүлүгүнө ишенбей турганын айтып, бирок Вашингтон Ислам республикасында козголоң чыгарууга аракет кылса, ага катаал жооп болорун эскертти.
