Этникалык кыргыздардын жогору окуу жайга кабыл алган квотасы боюнча бүгүн Каныбек Капашовичке бир эмес эки жолу кирип чыктым, 5 мүнөттөн ашык күттүрбөстөн кабыл алды. Маселени маданияттуу түрдө талкууладык, негизи кызыл-чеке боло турган иш болчу, эмоцияга алдырбадык.
Чет-бучкагын айта кетсем, быйыл белгилүү жана белгисиз жагдай-шарттарга байланыштуу Мургаб менен Жерге-Талдан балдар азыраак келип, айрымдары келгенге жетишпей калды. Келген балдардын айрымдары босого баллдан аша албады деген бүтүм чыкты. 14 орун бош калды. Мен алгач бөлүм башчысына кирип, “Байдын ашын байкуш аяайт” кылбай, мамлекет берген бош орундарга эптеп алыстан келген балдарды өткөрүш керек, же 2-тур кылгыла десем көнүшпөдү. Анан аргасыз орун басарга, анан министрге эки ирет кирип, экинчи тур өткөргөнгө шарт түздүк. Менин арызымдын негизинде күзгү сынак менен 2-тур өтмөй болду. Ал эми 1-турда алган баа менен өткөргөнгө буга чейин кабыл алынган ички документтер тоскоол болот имиш. Арга жок жер муштадык, 14 орун бош калды…
Негизи, этникалык кыргыздар окусун деп мамлекет орундарды берип жаткан соң аны татаалдаштырып, ички процедураларды түзүп алуунун өзү акылсыздык деп эсептейм. Бир тобун өтпөдүң деп кетирип, 14 орунду сактап калуунун эмне кереги бар эле? Келген балдар сумсайып кетпей ошого окуса болбойт беле? 30 жылдан бери китеп барбаган мектептерде окуп келген балдарга чоң талапты коюнун өзү, орой айтканда акмакчылык. Кыйын болсо ошол шарты катаал Мургаб, Жерге-Талга барып жашап, окуп көрүшсүнчү.
Канча жылдан бери Билим министрлигиндеги бир бөлүм этникалык кыргыздарга жардам бергендин ордуна шыйракка чаап жатпайбы!
Мен түз эфирден Президентке да кайрылып, бир жылы этникалык кыргыздарга берилген орунду сатып жибергенин айткам. Ал документтер колумда турат…
Садыр Нургожоевич менен Камчыбек Кыдыршаевич ушул маселени да көзөмөлгө алышы керек…
