Кыргызстан Африка өлкөлөрү менен алаканы жакшыртууга ниеттенүүдө.
Бул маалыматты тышкы иштер минимтрлигинен билдиришти.
Маалыматка ылайык, министрдин биринчи орун басары Асеин Исаев Аддис-Абеба шаарында Кения, Ботсвана, Либерия, Мали, Гвинея, Ливия, Мадагаскар, Гвинея-Бисау, Сомали, Эсватини жана башка аймактагы мамлекеттердин өкүлдөрү менен жолугушкан.
Анда Исаев Кыргызстан бул аймак менен кызматташтыкты чыңдоого кызыкдар экенин билдирди.
Тараптар эл аралык актуалдуу маселелерди, эки тараптуу байланыштарды кеңейтүү жолдорун жана Кыргызстандын эл аралык уюмдар менен, анын ичинде БУУнун тандап алынуучу органдары менен иштешүү демилгелерин талкуулашкан.
Мындан тышкары, Исаев Аддис-Абеба шаарындагы Африка Биримдигинин штаб-квартирасында уюмдун өнөктөштүк жана ресурстарды мобилизациялоо департаментинин башчысы Стив Патрик Лаленде менен жолугуп, жогорку деңгээлдеги визиттерди уюштуруу жана Кыргызстандын Африка Биримдигинде байкоочу мамлекет статусуна ээ болуу мүмкүнчүлүктөрүн карашкан.
Уюмдун туруктуу катчылыгы Аддис-Абебада жайгашкандыктан өлкө башчыларынын ортосунда саммиттер уюштурулат. Айрыкча Тышкы иштер министрликтеринин ортосунда тез-тез жыйналыштар болуп, мында түрдүү континенталдык жана дүйнөлүк проблемалар каралат
Белгилей кетсек, Африка Биримдиги — 54 мамлекетти бириктирген уюм, анын максаты – өлкөлөрдүн саясий, социалдык-экономикалык жана маданий байланыштарын бекемдөө, бирдиктүү позицияларды алдыга жылдыруу болуп саналат.
Маалымат иретинде:
II Дүйнөлүк согуштан кийин Африка континентинде көптөгөн эгемендүү мамлекеттер пайда болгон. 1963-жылы ал өлкөлөр Эфиопиянын борбору Аддис-Абебада уюм куруу жөнүндө чечим чыгарышкан.
Бул келишимдин негизги максаты – Африка өлкөлөрүнүн ортосундагы достук жана биримдикти өнүктүрүү.
Ошол эле учурда Африка континентиндеги колониализимдин изин жоготуу болгон. (Колониализм — экономикалык жактан начар өнүккөн өлкөнү, аймакты жана элди согуштук, саясий же экономикалык кысымдын жардамы менен мамлекеттер тобунун эзүүсү жана көз каранды кылуусу).
Алгачкы уюштуруучулар 30дан ашык Африка мамлекеттери болуп, кийинчерээк бул уюмга жаңы мамлекеттер кошулган.
Уюмдун туруктуу катчылыгы Аддис-Абебада жайгашкан. Өлкө башчыларынын ортосунда саммиттер уюштурулат. Өзгөчө тышкы иштер министрликтеринин ортосунда тез-тез жыйналыштар болуп, мында түрдүү континенталдык жана дүйнөлүк проблемалар каралат.



















