Африкада жашаган миллионерлердин жалпы саны алдыдагы он жылда 65 пайызга өсөт деп күтүлүүдө. Бул тууралуу континенттеги учурдагы байлык тууралуу маалымат камтылган консалтингдик компания Henley & Partners даярдаган докладда айтылат.
Уюмдун эсептөөлөрүнө ылайык, азыр Африкада 122,5 миң миллионер бар, алардын ичинен үчтөн бири (41,1 миңи) Түштүк Африка Республикасында жашайт. Миллионерлердин саны боюнча алдыңкы бештикке Египет (14,8 миң), Марокко (7,5 миң), Нигерия (7,2 миң) жана Кения (6,8 миң) кирди.
Ал эми Африкадагы миллиардерлердин саны 25ке жеткен. Henley & Partners муну XX кылымдын аягындагы абал менен салыштырганда таң калыштуу көрүнүш деп баалады, анткени ал кезде алар «санаалуу эле болгон», көптөгөн африкалык өлкөлөрдүн экономикасы болсо узакка созулган кризисте турган.
Forbes маалыматтарына ылайык, 2025-жылдын март айынын аягында африкалык миллиардерлердин жалпы байлыгы тарыхта биринчи жолу 100 миллиард доллардан ашып, былтыркы 82,4 миллиарддан 105 миллиард долларга көтөрүлгөн.
Континенттин эң бай тургуну катары 2024-жылы дагы бир жолу (14-жолу катарынан) 67 жаштагы нигериялык Алико Данготе аталды. Ал өлкө борбору Лагостун четинде жаңы мунайды кайра иштетүүчү завод ачып, өз позициясын чыңдады. Бул завод өлкөгө айрым мунай продуктыларын экспорттоого жол ачат.
