Бүгүн, 13-март күнү, Кыргызстан менен Тажикстандын президенттери мамлекеттик чек ара жөнүндөгү келишимге кол койгондон кийин чек арадагы эки өткөрмө бекет салтанаттуу түрдө кайра ачылды.
Чек ара кызматынан билдиришкендей, Баткен районундагы “Кызыл-Бел” өткөрмө бекети эл аралык деңгээлде, ал эми Лейлек районундагы “Кайрагач” бекети эки тараптуу болуп ачылды.
Эки өлкөнүн ортосунда “Кулунду” (“Овчи-Калъача”), “Кызыл-Бел” (“Гулистон”), “Кайрагач” (“Маданият”), “Карамык” жана “Бор-Дөбө” (“Кызыл-Арт”) аттуу беш өткөрмө бекет бар. Эми калган үч өткөрмө бекети ачуу этап-этабы менен жүргүзүлө турган болууда.
Кыргызстан менен Тажикстандын ортосундагы алака 2021-жылдын апрель айында чек арада болгон кандуу окуядан кийин солгундаган. Мындан улам Кыргызстан 2021-жылдын 21-майынан баштап, Тажикстан менен чек араны бир тараптуу жапкан.
Сүрөт, видео: КР Президентинин администрациясы жана Жеңиш Айдаров



















