“Крокус Сити Холлдо” теракт жасагандар террорчулардын жана экстремисттердин тизмесине киргизилди.
Бул тууралуу маалымат Росфинмониторинг сайтында жарыяланды.
Тизмеге киргендер:
- Фаридуни Шамсидин, 1998-жылы туулган;
- Мирзоев Далержон, 1991-жылы туулган;
- Файзов Мухаммадсобир, 2004-жылы туулган;
- Рачабализода Саидакрами, 1994-жылы туулган.

Алардын баары Тажикстандын жарандары.
Москванын жанындагы Красногорск шаарындагы “Крокус сити холл” концерттик залына кол салуу 22-март күнү кечинде болгон. Имаратка куралчан төрт адам кирип келип, ал жердеги адамдарды аткылап, бир нече жерге от коюп, окуя болгон жерден из жашырып кетишкен.
Кылмыш иши “теракт” беренеси боюнча козголгон.
Теракт жасаган кылмышкерлердин баары 23-март күнү эртең менен Брянск облусунда кармалган. Алар Тажикстандын жарандары Далержон Мирзоев, Саидакрами Рачабализода, Шамсидин Фаридуни жана Мухаммадсобир Файзов болуп чыккан.
25-мартка караган түнү Москванын Басман соту аларды 22-майга чейин камакка алуу чечимин чыгарган. Аларга уюшкан топтун курамында адам өлүмүнө алып келген теракт жасаган деген айып тагылды.
ФСБнын маалыматы боюнча, террордук чабуулга шектелип жалпы 11 киши кармалган.
25-мартта ишке катышы бар деген шек менен дагы төрт киши Исроил Исломов, анын уулдары Аминчон жана Диловар ошондой эле Алишер Касимов кармалган. Басман соту аларды 22-майга чейин камакка алган.
Акыркы маалыматтар боюнча кол салуудан 143 адам каза тапты.

















