Улуттук коопсуздук мамлекеттик комитетинин кызматкерлеринин талабына баш ийбей ок чыгарып, каршылык көрсөткөн “кримтөбөл” Камчы Көлбаев Бишкектеги Blonder pub эс алуу жайында жок кылынган эле. Өткөн жумада анын өлүмү коомчулуктун көңүл борборунда болуп, социалдык түйүндөрдө кызыл-чеке болгон талаш-тартыштардын чордонунда талкууланды.
Элдин пикирине көз чаптырсак, кыргыз коомчулугунун бир катмарынын аң-сезими өйдөлөп өспөй, баягы феодалдык доордогудай катып калганы байкалды. Башкасын мындай кой, ак менен караны, бийлик менен криминалды ажырата албаган жарандар бар экени таң калтырды. Алар ажылдап чыгышып, “Көлбаевди жамандап, каракчы көргөзүүгө аракет кылбагыла”, “Кыргыздын кыраан жигитин ит аткандай атып салышты”, “Ал кыргыздын чыныгы баатыры болчу”, “Анын эрдиги жүрөгүбүздө сакталат”, “Эртең жооп бересиңер” деген өңдүү сөздөрүн жазышты. Бул абдан кейиштүү, кабырганы кайыштырган жагдайды жаратты. Биздин мамлекетте мындай чабал, тар түшүнүктөгү адамдардын арбын экени акыл-парасаттуу мекендештердин жанын кейитип, жүлүнүн зыркыратты.
Мындай феодалдык түшүнүктөн чыга албаган адамдардын арабызда жашап жатышы, мамлекетибиздин ыкчам өнүгүп-өсүүсүнө тоскоол болору турган иш. Анткени, биздей өкмөттүн карамагында завод-фабрикасы жок өлкөлөрдү жеке ишкерлер гана экономиканы өргө сүрөйт. Баарыбызга маалым, ири жана чакан ишкерлердин баарын криминалдык топтор коркутуп-үркүтүп, кирешесинин бир бөлүгүн мите курттай соруп келе жатышат. Атургай, ишкерди жок кылып же сыртка кууп чыгып, соода жайларын, мүлкүн тартып алган учурлары да арбын болгон.
Кыскасы, криминалдык топторду түзгөн каракчылар мамлекеттин өсүшүнө салым кошоюн деген мекедештерибиздин тизесине чаап, кокосуна тикен болуп сайылып калышкан. Ак эмгеги менен акча тапкан ишкерлерди тоноп, экономиканы өстүрбөй тушап жаткан чоң илдеттен 30 жылдан бери кутула албай келген элек.
Кудайдын кулагы сүйүнсүн дешибиз керек, жакындан бери иш кызуу башталды. Жалпыбыз мамлекетке каршы иштеген каракчыларга каршы күрөштү колдоого милдеттүүбүз. Экономиканы соолутуп жаткан криминалга эч бир аёо болбош керек. Баарын темир торго киргизип, каршылык көрсөткөнүн бир чекеден жок кылуу зарыл. Анан бул ишти туура эмес көргөн, кылмышкерлерге жана “кримтөбөлгө” боор тарткан феодалдык түшүнүктөгү пенделерге түшүнбөй турабыз. Айтышсынчы, кайсы эмгеги үчүн биз аларды баатыр дешибиз керек?
Бюджетке түшчү акчаны кемирип, экономиканы талкалаганы үчүнбү? Бизнесмендерди тоноп, өлтүрүп, байлыктарын тартып алган үчүнбү? Же спортчу балдарды жолдон чыгарып, баңгизатына көндүрүп, канчалаган жаш кызды зордуктаганы үчүнбү?
Зулпукаар Сапанов.
