Казакстан менен Өзбекстандын чек арасында нефть продукцияларын мыйзамсыз ташууга байланышкан эл аралык кылмыштуу топтун ишмердүүлүгү токтотулду, деп билдирди NUR.KZ Финансылык мониторинг агенттигине (ФМА) таянып.
ФМАнын расмий Telegram-каналындагы маалыматка ылайык, Түркестан облусунун ФМА департаменти, Улуттук коопсуздук комитетинин бөлүмү жана Өзбекстандын укук коргоо органдары менен биргелешкен операциянын алкагында трансчекералык кылмыштуу топтун ишине чек коюлду. Топ Казакстан менен Өзбекстандын чек арасында 450 метр узундуктагы жер алдындагы туннелди казып, нефть продукцияларын жашыруун ташып жаткан.
“Казакстан менен Өзбекстандын чек арасындагы тилкеде адамдар тобу 450 метр узундуктагы жер алдындагы туннелди казып чыгышкан.
Мыйзамсыз ишмердүүлүк 2 ай бою жүргүзүлгөн. Бул аралыкта кылмыштуу топ чет өлкөдөн каржылоону, логистиканы жана күйүүчү-майлоочу материалдарды ташууну камтыган туруктуу контрабандалык схема түзгөн”, — деп билдиришти ФМАдан.
Ошол эле учурда Өзбекстандын укук коргоо органдары дагы өз аймагында ушундай операция өткөрүшкөн.
“Операциянын жүрүшүндө кылмыштуу схеманын бардык катышуучулары аныкталды, алардын ичинде өзбекстандыктар да бар. Шектүү катары Казакстандын 5 жараны кармалды.
Учурда иликтөө аяктап, иш сотко жөнөтүлдү”, — деп маалымдашты агенттиктен.
Эске салсак, 2024-жылдын декабрында Казакстан менен Өзбекстанда нефть контрабандасына байланышкан кылмыштуу топтун иши токтотулуп, ошол эле 450 метрлик туннель табылганы кабарланган.
Түркестан облусунун прокуратурасынын маалыматы боюнча, бул туннель аркылуу күн сайын 5–7 тоннага чейин күйүүчү май мыйзамсыз ташылып турган. Атайын операциялардын натыйжасында кылмыштуу топтун бардык мүчөлөрү, анын ичинде өзбек жарандары да кармалган.
“Казакстан жана Өзбекстан аймагында иштеген трансулуттук кылмыштуу топтун мүчөлөрү кармалды. Учурда сотко чейинки тергөө иштери уланууда”, — деп билдирген болчу көзөмөл органы.
https://www.youtube.com/watch?v=INsdVg2eQgE


















