Казакстандын Түркестан облусунда Өзбекстан менен чек арага чейин узундугу 152 чакырымды түзгөн Дарбаза-Мактаарал жаңы темир жол линиясынын курулушу башталды, деп билдирди Казакстан Республикасынын премьер-министринин басма сөз кызматы. Бул тууралуу Sputnik Өзбекстан жазды.
«Жаңы темир жол линиясынын курулушу учурдагы Сарыагаш-Ташкент участогунан жүктөрдү жаңы линияга багыттоого, Сарыагаш станциясындагы тыгындарды жоюуга жана жалпы Өзбекстанга экспорттук жүктөрдү көбөйтүүгө мүмкүндүк берет», — деп айтылат билдирүүдө.

Бул ири инфраструктуралык долбоордун алкагында казак-өзбек мамлекеттик чек арасы аркылуу жаңы өткөрүү пункту ачылат.
Казакстандын Министрлер Кабинетинин басма сөз кызматы билдиргендей, долбоор эки этапты камтыйт. Биринчиси, Сырдарыя станциясына чыгуучу – Ердаут – Мактаарал линиясын курууну камтыйт. Экинчи этап Жетисай линиясын эксплуатацияга киргизүүнү камтыйт.

Бардыгы болуп 152 километр темир жол курулат. Долбоор үчүн алар 19,7 миң тонна рельстерди, ошондой эле 280 миң комплект темир-бетон шпалдарын жана рельс бекиткичтерин сатып алууну пландаштырууда.
Белгилей кетсек, 2023-жылдын башынан бери Казакстан менен Өзбекстандын ортосундагы жүк ташуунун көлөмү 25,8 миллион тоннаны түздү. Негизги жүк агымы Сарыагаш мамлекеттер аралык түйүн станциясы аркылуу өтөт. Казакстандын премьер-министри Алихан Смаилов билдиргендей, жыл аягына чейин Өзбекстан менен жүк ташуу көлөмү болжол менен 31 миллион тоннаны түзөт, бул өткөн жылга салыштырмалуу 16%га жогору.



















