Суу ташкындарына даярдануу үчүн Казакстан менен Орусия эки өлкөнүн ортосундагы бардык трансчек аралык дарыялар боюнча күн сайын маалымат алмашып турат. Маалымат алмашуу сел мезгили аяктаганга чейин уланат.
Бул маалыматты Казакстандын Суу чарба жана ирригация министрлигине шилтеме берүү менен «Казинформ» агенттиги жазды.
«Суу ташкындарына даярдануу үчүн Казакстан менен Орусиянын ортосунда аккан бардык трансчек аралык дарыялар боюнча күн сайын маалымат алмашууну баштады. Маалымат алмашуу сел мезгили аяктаганга чейин уланат», – деп айтылат маалыматта.
Сугат министрлигинен билдиришкендей, жыл башынан бери сел жана суу ташкындарын өткөрүүдө өз ара аракеттенүү боюнча казак-орус биргелешкен жумушчу тобунун эки отуруму өттү.
Бул жолугушууларда тараптар бири-бирине суу сактагычтардын белгиленген жана пландаштырылган иштөө режимдери жөнүндө маалымат беришти.
Ошондой эле суу сактагычтарга суунун агып кириши жана трансчек аралык дарыялардагы суунун күтүлүп жаткан деңгээли боюнча болжолдор менен алмашышты.
Учурда Казакстандын дарыяларында жана суу сактагычтарында суунун деңгээли такай көзөмөлдөнүп, 24 сааттык күзөт уюштурулуп, суу сактагычтар сел сууларын кабыл алуу жана коопсуз өткөрүү үчүн эркин сыйымдуулук менен камсыздалган.
«240 километр дарыялар тазаланды, анын ичинде Орусиянын аймагынан агып өткөн Эртис жана Жайык дарыялары да тазаланды», – деди суу чарба жана ирригация министринин орун басары Нурлан Алдамжаров.
Буга чейин Казакстан суу ташкынына байланыштуу кырдаалга күнү-түнү мониторинг жүргүзүүгө өтүп жатканы маалымдалган. Мындай буйрукту премьер-министр Олжас Бектенов берип, акимчиликтер калктуу пункттарды суу каптап кетпеши үчүн комплекстүү чараларды көрүшү керектиги айтылган.
Эске сала кетсек, 2024-жылы апрель айында Казакстанда селден улам 100 миңдей киши эвакуацияланып, өлкө президенти Касым-Жомарт Токаев ал кырдаалды «болуп көрбөгөндөй жаратылыш кырсыгы» деп атаган.
Айрыкча Батыш Казакстан, Атырау, Актөбө, Караганды, Костанай, Түндүк Казакстан жана Акмоло облустары көбүрөөк жабыркаган.
Ал масштабдуу суу ташкынында куткарылган элдин 16 миңдейи балдар болгон.



















