Мамлекеттик жана укук коргоо органдарынын алдын ала эскертүүлөрүнө карабастан, өлкөбүздө каржы пирамидаларына алданган жарандар көбөйүүдө. Мисалы, ички иштер органдары тарабынан 2023-жылдын 12 айында каржы пирамида фактылары менен жалпысынан 358 кылмыш иши тергелген, анын ичинен 217 кылмыш ишинин тергөөсү аяктап соттук кароого жиберилип, 98 кылмыш иши боюнча учурда тергөө иштери улантылып келет.
Каржы пирамидасына байланыштуу кылмыш фактыларынын басымдуу көпчүлүгү Бишкек шаарында, Жалал-Абад жана Ысык-Көл облустарында катталса, калган бөлүктөрү Чүй, Баткен жана Талас облустарында катталган.
Аталган министрликтин маалымат кызматынын билдирүүсү боюнча, кылмыш иштери боюнча жабырлануучулардын жалпы саны 350 адамдан ашып, келтирилген материалдык чыгым 68 мил. сомдон ашкан. Ал эми, кылмыш иштери боюнча жалпысынан 40 адам жоопко тартылган.
Баарынан таң каларлыгы, карапайым жарандар каржы пирамидаларынын жомоктогудай байып кетүү тууралуу жалган убадаларына ишенип, тез эле тузагына түшүп калышат. “Жогоруда көрсөтүлгөн фактыларды талдап келгенде, жеңил акчанын артынан түшкөн жарандарыбыз аз убакыттын ичинде чоң дивиденттерди убада кылган “кайрымдууларга” карызга батып, акча берип алданып келе”,- деп айтылат маалыматта.
Алдамчылар адатта жакшы манипуляторлор жана акча алуунун жаңы жолдорун ойлоп табуу менен адамга психологиялык жана эмоционалдык жактан таасир этүүнү билишет.
Каржы пирамида – каржы алдамчылыктын эң кеңири таралган түрлөрүнүн бири.
Каржы пирамидалар өздөрүн уюмдардын дээрлик бардык формасы катары жашырып иш алып барышы мүмкүн.
“Ошондуктан ак эмгек менен тапкан акчаңызды мындай уюмдарга салаардан мурун, кырдаалды кылдаттык менен баалаңыз. Суроо берүүдөн жана документтерди талап кылуудан коркуунун же тартынуунун кереги жок. Эсиңизде болсун: чоң суммадагы кирешелер чоң тобокелдиктерсиз болбойт!”,- деп эскертет ички иштер министрлиги.



















