Ош облусундагы Кара-Кулжа-Алайкуу автоунаа жолунун 8-чакырымдан 130-чакырымына чейин ачылды. Бул тууралуу Президенттин Ош облусундагы өкүлчүлүгүнүн маалымат кызматынан билдиришти.
Маалыматка ылайык, аталган жолду тазалоо иштери тынымсыз жүргүзүлүп жатат. Бүгүн 130-чакырымдан 70-чакырымга чейин түшкөн көчкүлөрдү ачуу иштери жүргүзүлдү. Тазалоо иштеринде 5 техника тартылган жана күйүүчү май толук жетиштүү.
Акыркы эки күндөн бери 30-40 см жааган кардын кесепетинен, жолго кар күрткүсү пайда болуп, жолдо көчкүлөр байма-бай түшүп жатат. Мындан улам райондук бийлик жүргүнчүлөрдү, зарыл болбосо, жолго чыкпай турууну сунушташат. Аймактарда ӨКМдин, ОшПЭСтин жана Жол тейлөө ишканаларынын ыкчам бригадалары иш алып барылып жатканы маалымдалды.
Ал арада Президенттин Ош облусундагы өкүлчүлугү облустун аймагындагы кар калың жааган аймактарда өзгөчө кырдаалдардын алдын алуу жана кесепеттерин жоюу боюнча облустук штаб өткөрдү.
Жыйында Кара-Кулжа-Алайкуу жана Алай, Чоң-Алай жолунун абалы, ошондой эле азык-түлүк коопсуздугу, тоют маселеси, билим берүү тармагы, социалдык объектилер талкууланды.
Ал эми облустук бийликтин маалыматында, Алай менен Чоң-Алай жолу ачык, каттам бар. Жайкы дөңгөлөктөр менен кыймылга тыюу салып, МАИ кызматкерлери жеринде иштеп жатышканы айтылат.
















