Министрлер кабинетинин төрагасы Акылбек Жапаров иш сапары менен Австриянын борбору Вена шаарына барды. Бул тууралуу МинКабдын маалымат кызматы билдирди.
Жумушчу сапарынын алкагында министрлер кабинетинин башчысы Эл аралык энергетикалык инвестициялык форумга катышат.
Талкуунун негизги темасы – Камбар-Ата ГЭС-1ди куруу долбоору болот. Мунун негизинде А. Жапаров европалык гидроэнергетикалык компаниялардын жетекчилери менен сүйлөшүүлөрдү жүргүзөт.
Мындан тышкары, министрлер кабинетинин төрагасы форумда өлкөнүн презентациясы менен чыгып, республиканын гидроэнергетикалык потенциалына арналган пленардык жыйынга жана панелдик сессияларга катышуусу пландалууда.
Ошондой эле Акылбек Жапаров бир катар эки тараптуу жолугушууларды өткөрүп, Австриянын европалык жана эл аралык иштер федералдык министри Александр Шалленберг жана Австриянын экономика жана эмгек федералдык министри Мартин Кохер менен жолугушат.
Эскерте кетсек, “Камбар-Ата-1” ГЭСинин курулушуна биринчи этаптагы даярдык иштери 8-июнда башталган. ГЭСтин курулушун баштоо салтанатына президент Садыр Жапаров менен Министрлер Кабинетинин төрагасы Акылбек Жапаров жана Энергетика министри Таалайбек Ибраев катышкан.
Буга чейинки маалыматтарга караганда, долбоордун биринчи этабында 486 миллион АКШ доллары керек болот.
Курулушка керектүү каражат республикалык бюджеттен бөлүнүп, мындан сырткары инвестиция да тартылат.
Министр Т. Ибраевдин Жогорку Кеңеште берген маалыматына караганда, “Камбар-Ата -1” ГЭСин курууга 2,8 миллиард доллар каражат керек болору эсептелген.
Долбоор боюнча “Камбар-Ата -1” Кыргызстандагы эң ири ГЭС болуп курулат. 1 миң 860 мегаватт кубаттуулукта курулуп, жылына 5 миллиард киловат саат электр кубатын иштеп чыга алат. Анын төрт агрегаты болот.
Дамбанын бийиктиги 256 метр, ал эми андагы топтолгон суунун көлөмү беш миллиард кубдан көп болот.



















