Ирандын спорттук делегациясы Кыргызстанда өткөн VI Дүйнөлүк көчмөндөр оюндарын 15 медаль — 4 алтын, 3 күмүш жана 8 коло менен жыйынтыктады.
Бул жолку оюндарда Реза Гайтаси таяк тартыш боюнча, Сажад Солтани-Нежад «Эң күчтүү адам» мелдешинде, Мостафа Нажефи күрөштүн гюлеш түрүнөн жана Мостафа Тогани пахлавани күрөшүндө Иранга алтын медаль алып келишти.
Күмүш медалдарды Садек Азаренг (кураш), Мохсен Мирзаи (оң кол күрөш) жана төрт адамдан турган аркан тартыш командасы — Надер Каземи, Сажад Жафари Гохари, Аббас Азими жана Хамидреза Саид жеңип алышты.
Коло медалдарга Марьям Фарахани-Ния (таяк тартыш), Абулфазл Хейдари-Мехр (алыш), Мохадесе Табарок (сол жана оң кол күрөшү боюнча), Амирреза Сахраи (ссирым күрөшү), Хасан Пулади (64 кг чейинки самбо), Пурия Шокри (казак күрөшү) жана Мерсад Шакери (кореш) ээ болушту.
Кыргызстандын Дене тарбия жана спорт мамлекеттик агенттиги VI Дүйнөлүк көчмөндөр оюндарынын расмий медалдык эсеби жүргүзүлбөй турганын билдирди.
Маалыматта VI Дүйнөлүк көчмөндөр оюндарынын концепциясына ылайык, оюндун алкагында расмий медалдык жана командалык эсеп, ошондой эле өлкөлөрдүн жеңип алган медалдарынын саны боюнча жалпы рейтинг жүргүзүлбөйт.
VI Дүйнөлүк көчмөндөр оюндары 31-августта Бишкек шаарындагы жаңы курулган «Бишкек Аренада» расмий ачылып, 6-сентябрга чейин уланды. Иш-чарага дүйнөнүн 100дөн ашуун өлкөсүнөн келген спортчулар, делегациялар, маданият өкүлдөрү жана коноктор катышты.
Оюндардын алкагында улуттук спорттун бир катар түрлөрү боюнча мелдештер өтүп, жеңүүчүлөр жана байге ээлери аныкталды. Ошондой эле Кырчын жайлоосунда көчмөн элдердин тарыхын, маданиятын жана салттуу жашоо образын чагылдырган кеңири маданий программа уюштурулду.
VI Дүйнөлүк көчмөндөр оюндары Кыргызстандын эгемендүүлүгүнүн 35 жылдыгын белгилөө жылы өтүп, өлкөнүн тарыхый-маданий мурастарын жана улуттук спортун эл аралык деңгээлде таанытууга багытталган маанилүү иш-чаралардын бири болду.
Дүйнөлүк көчмөндөр оюндарынын кийинки, VII баскычы Россия Федерациясынын Татарстан Республикасында өткөрүлөт.















