Бүгүн, 15-декабрда борбор калаанын Токтогул Сатылганов атындагы Кыргыз улуттук филармониясында экинчи Элдик курултай башталды.
Бул жолу курултайга 700гө жакын делегат келди. Анын ичинен 640 киши Кыргызстандын аймактарынан, 30 адам этностук өкүлчүлүктөрдөн, 30 делегат чет өлкөдөгү эмгек мигранттарынан шайланышты.
Элдик курултайга президент Садыр Жапаров, Жогорку Кеңештин депутаттары, Министрлер кабинетинин мүчөлөрү, мамлекеттик органдардын жана жергиликтүү өз алдынча башкаруу органдарынын өкүлдөрү катышууда.
Курултай 15-16-декабрь күндөрү өтөт.
“Элдик курултай жөнүндө” конституциялык мыйзам быйыл 24-июлда кабыл алынган. Алгач президент Садыр Жапаров сунуштаган мыйзам долбоорун кайра иштеп чыгуу үчүн кийин депутаттардын жумушчу тобу түзүлгөн.
Ага ылайык, делегаттардын саны 1070тен 700гө чейин азайтылган. Элдик курултай демилгеси Кыргызстанда көп жылдардан бери айтылып, бирок аны мамлекеттик деңгээлде уюштурууга негиз болуучу жаңы мыйзам кабыл алына элек болчу.
Экинчи элдик курултайдын ишин мамлекеттик катчы Сүйүнбек Касмамбетов ачып, эки делегат мыйзамга ылайык, дагы үч делегат жүйөлүү себептер менен катыша албай, жалпы 695 делегат катышып жаткандыгын билдирди. Алгач жер жерлерден келген делегаттардан 17 улуттук кеңештин мүчөлөрү шайланды. С. Касмамбетов Улуттук кеңештин төрагалыгына Мыктыбек Абдылдаев 14 добуш алып шайлангандыгын, ал эми эсептөө палатасынын төрайымы болуп 13 талапкердин ичинен Асел Лабаева шайлангандыгын билдирди.
Биринчи элдик курултай былтыр ноябрда өткөн.
