21-февралда Иранда бир катар университеттердин студенттери декабрь айындагы баш аламандыктарда каза болгон адамдарды эскерүү максатында акцияларды өткөрүштү. Катышуучулар өлкөнүн желегин көтөрүп чыгышып, акыркы террордук окуяларды айыптап, маркумдарды эскеришти.
Акциялар жаңы окуу семестринин башында болуп, нааразычылык акцияларында курман болгондорду эскерүүнүн 40-күнүнө туш келди.
“Fars News” агенттиги маалымдагандай, Тегеран, Шариф жана Шахид Бехешти университеттеринин студенттери окуу жайлардын аймагында чогулуп, өлкөдө болуп өткөн баш аламандык аракеттерине жана АКШ менен Израилдин саясатына каршы нааразылыктарын билдиришти.
Шариф университетинде студенттер АКШ менен Израилдин желектерин, ошондой эле АКШ президенти Дональд Трамптын сүрөтүн өрттөштү.
Бехешти университетинде студенттердин бир тобу акыркы курман болгондордун сүрөттөрүн кармап, университеттин аянтында жүрүш өткөрүштү.
Акциянын соңунда Тегеран жана Шахид Бехешти университеттеринде бир топ студенттер кампуста жамааттык намаз окушту.
Бул акциялар менен катар айрым университеттерде чыңалуулар да орун алды. Алсак, Хадже Насир университетинде электротехника факультетинин терезелерин сындырып салышкан. Ошондой эле, Амиркабир, Шариф жана Илим жана технология университеттеринде айрым студенттер бийликке каршы ураандарды чакырышкан.
Шариф университетинде эки адам кыска убакытка Пехлеви шахынын учурундагы желекти көтөрүп чыгышкан. Студенттердин айтымында, бул аракеттер ЖМКлардын көңүлүн буруу үчүн жана Иранга каршы басылмаларга сүрөттөрдү жөнөтүү үчүн жасалган.
Тегеран университетинде бир нече адам студентке таш ыргытып, ал жаракат алган.
Айрым чет элдик ЖМКлар студенттер менен полициянын ортосунда кагылышуу болуп, акцияларга атайын бөлүктөр тартылганын билдиришкен. Бирок Ирандын укук коргоо күчтөрүнүн (Фаража) басма сөз кызматы бул маалыматты четке какты.
Ирандын укук коргоо күчтөрүнүн басма сөз кызматы акыркы эки күн ичинде жүргүзүлгөн текшерүүнүн жыйынтыгында атайын бөлүктөр же полициянын ыкчам жардам берүүчү бөлүмдөрү өлкөнүн бир дагы университетинде болбогонун маалымдады. Тараган маалымат жалган жана эч кандай ишенимдүү булакка негизделген эмес экени белгиленди.
Ошондой эле жарыяланган сүрөттөр жасалма экени, алар жасалма интеллекттин жардамы менен даярдалганы айтылды.
Эске салсак, Ирандагы декабрда болгон нааразылык акциялары улуттук валюта — риалдын кескин арзандашынан улам башталган. Бул жагдай дүң жана чекене баалардын өсүшүнө, ошондой эле валюта курсунун туруксуздугуна алып келген.
8-январдан тарта тынч мүнөздөгү митингдер башаламандыктарга айланган. 1979-жылы тактан кулатылган шахтын уулу Реза Пехлеви жалданма демонстранттарды стратегиялык маанидеги көчөлөрдү жана объекттерди ээлөөгө үндөп, АКШнын президенти Дональд Трамптан кырдаалга кийлигишүүнү суранган.
Ирандын Тышкы иштер министри Аббас Арагчинин айтымында, демонстранттардын арасына куралчан террорчулар кошулган. Айрым шаарларда митингдер коопсуздук күчтөрү менен кагылышууларга айланып, өлкө аймагында интернет иштебей калган.
Иран бийлиги баш аламандыктарды уюштурууда АКШ менен Израилди айыптаган. Баш аламандыктарга 10дон ашык чет өлкөнүн атайын кызматтары катышкан.
12-январда бийлик кырдаал көзөмөлгө алынганын билдирсе, эки күндөн кийин Тышкы иштер министри Аббас Аракчи баш аламандыктар толук токтогонун жарыялаган. Окуяларда болжол менен 3 миңден ашуун адам каза болгон.


















