Ирандын Эксперттер кеңеши өлкөнүн экинчи Жогорку лидери Али Хаменеинин өлүмүнөн кийин Можтаба Хаменеини Ислам Республикасынын жаңы Жогорку лидери кылып шайлады. Бул тууралуу Ислам Республикасынын Эксперттер кеңешине шилтеме берүү менен “Fars News” агенттиги билдирди.
«Эксперттер кеңешинин чечими менен Можтаба Хаменеи Ирандын үчүнчү жогорку лидери болду», — деп айтылган билдирүүдө. Маалыматка ылайык, чечим бир добуштан кабыл алынган.
Можтаба Хаменеи — аятолла Али Хамененин уулу. Ал Ислам Республикасынын тарыхындагы үчүнчү жогорку лидер болуп калды.
Можтаба Хаменеи шайланган кийин өлкөдөгү бардык аскердик, саясий, диний, маданий структуралар жаңы лидерге берилгендигин билдиришти.
Ислам революциясынын сакчылар корпусу (КСИР) жаңы лидерге берилгендик антын беришип, анын бардык көрсөтмөлөрүн аткарууга даяр экенин билдирди.
«Сакчылар корпусу берилге нжоокер жана бийликтин кубаттуу тиреги катары, урматтуу Эксперттер кеңешинин чечимин колдоп, аятолла Сейед Можтаба Хамененин бардык көрсөтмөлөрүнө толук баш ийүүгө жана жан аябастык менен аткарууга даяр», — деп айтылат сакчылар корпусунун билдирүүсүндө. Бул билдирүүнү Ирандын мамлекеттик телерадиокомпаниясы таратты.
Ирандын тышкы иштер министри Сейед Аббас Аракчи дагы жаңы лидерди куттуктап, өлкөнүн дипломатиялык корпусу толугу менен ага берилгендигин билдирди. Анын айтымында, бул чечим өлкөнүн эгемендигин жана аймактык бүтүндүгүн кепилдеп, улуттук биримдикти жана ынтымакты бекемдейт.
Ирандын армиясы дагы Эксперттер кеңешинин чечимин колдоп, жаңы жогорку лидерге бирилгендик антын беришти.
“Ирандын Куралдуу күчтөрүнүн командачылыгы жаңы Жогорку лидер Можтаба Хаменеиге берилгендик антын берди”, – деп билдирди Ирандын мамлекеттик телеканалы.
Ошондой эле Ирандын ички коопсуздук күчтөрү да Жогорку лидерге берилгендигин жарыялап, анын бардык буйруктарын аткарарын билдиришти.
Өлкөнүн президенти Масуд Пезешкиан жаңы лидердин шайланышын «Иран элинин эркинин чагылышы» деп атады.
Мындан тышкары, диний мекемелер, маданий жана медиа чөйрөнүн өкүлдөрү да жаңы Жогорку лидерге колдоо көрсөтүп, ага берилгендик анттарын жарыялашты.















