Ирандын президенти Масуд Пезешкиан өлкөнүн борбордук банкына Борбордук банктын мыйзамына өзгөртүүлөр күчүнө киргени тууралуу кабарлады, анда башка нерселер менен катар улуттук валютаны деноминациялоо каралган. Бул тууралуу Ислам Республикасынын президентинин басма сөз кызматы билдирди.
Буга чейин тиешелүү өзгөртүүлөрдү бир палаталуу парламент — Меджлис жана Ирандын Конституциясын сактоочулар кеңеши жактырган.
Мыйзамдагы түзөтүүлөргө ылайык, жүгүртүүгө XIX кылымда жана XX кылымдын башында колдонулган кран деп аталган майда акча бирдиги да киргизилет. Ошентип ар бир жаңы риал 10 миң эски риалга барабар, ошондой эле ар бир жаңы риал 100 кранга тең болот.
Конституцияны сактоочулар кеңешинин өкүлү Тахан Назиф 8-ноябрда билдиргендей, деноминацияны ишке ашырууда бир нече жылдык өтүү мезгили каралган жана бул мезгил ичинде калкты маалымдоо кампаниясы жүргүзүлөт.
Иран банкноталарынан төрт нөл алынып салынат, ал үчүн үч жылдык өткөөл мезгил белгиленет. Үч жылдык өтүү мезгили – учурдагы жана жаңы риалдын бир убакта жүгүртүлүшүн карайт. Бул аралыкта учурдагы банкноталар жана тыйындар акырындык менен жүгүртүүдөн чыгарылат.
