Ирандын ички иштер министри Эскандар Моменинин айтымында, өлкөдөн 1,2 миллиондон ашык афганстандык буга чейин эле чыгып кеткен, эми жалпысы 2 миллион мыйзамсыз мигрантты акырындап кайтаруу пландаштырылууда.
Министр белгилегендей, эң көп мигранттар Хорасан-Резави провинциясынын чек арасында катталган. Азырынча өлкөдөн 1 200 000 афган жараны чыгып кеткен. Кийинки кезекте чек араны мыйзамсыз кесип өткөндөрдү кайтаруу маселеси турат.
Эскандар Момени бүгүн Мешхед шаарындагы иш сапарында чет элдик жарандар жана чек араларды башкаруу боюнча атайын жыйын өтөрүн жарыялады. Анын айтымында, Ички иштер министрлигинин эң маанилүү багыттарынын бири – чек араларды жабуу процессин кароо жана мыйзамсыз мигранттар менен иштөөнү уюштуруу. Бул маселелер улуттук жана аймактык органдардын катышуусунда кечки жыйында талкууланат.
Министр белгилегендей, биринчи этапта 2 миллион мыйзамсыз мигрантты кайтаруу каралууда.
«Азыркы учурда Иранда 6 миллиондон ашык Афганистан жараны жашайт. Бул топту көзөмөлдөө олуттуу улуттук жана эл аралык кызматташууну талап кылат», — деди ал.















