Индия Беларусь аймагында өтүп жаткан «Батыш-2025» россия-беларус биргелешкен аскердик машыгууларына катышуу үчүн өзүнүн аскердик контингентин жөнөттү. Бул тууралуу The Times басылмасы Индиянын Коргоо министрлигинин билдирүүсүнө таянып жазды.
Машыгууларга катышуу үчүн Индиядан 65 аскер, анын ичинде элиталык Кумаон полкунун жоокерлери келди. Индиялык аскерлер тактикалык машыгууларга жана атайын куралдарды колдонуу боюнча иш-чараларга катышат. Индия бийлиги бул кадам Россия менен коргонуу кызматташтыгын чыңдоого жана достук мамилелерди өнүктүрүүгө багытталганын белгилеп, бул «өз ара ишеним жана кызматташтык духун бекемдейт» деп айтты, деп жазат The Times.
Басылма эскерткендей, Индия Россиянын «Батыш» машыгууларына Украинадагы толук масштабдуу согуш башталганга чейин да катышып келген жана андан кийин да бир катар россиялык аскердик машыгууларга катышкан. АКШлык геостратегия боюнча консультант Дэвид Меркел Нью-Делинин бул чечими Индиянын Москва менен болгон мамилелерине чоң маани берип жатканын көрсөтөт дейт. Анын айтымында, Индиянын машыгууларга катышуусу — Россиянын дрондору Польшанын аймагына киргенден кийин жана АКШ менен болгон мамилелер муздап турган шартта — Вашингтон менен коопсуздук жаатындагы кызматташуунун келечегине тынчсыздануу жаратат:
«Бул Нью-Делинин Москва менен болгон мамилелерине канчалык артыкчылык берип жатканын көрсөтөт. Моди АКШ президенти Трамп менен болгон мамилесинин белгисиздигин эске алуу менен Москвага барган сайын көбүрөөк таянууда», — дейт Меркел.
Немис аналитиги Ульрих Спек болсо бул кадам менен Индия «кызыл сызыктан өттү» деп белгиледи.
Ошол эле учурда Беларусь Коргоо министрлиги машыгууларга АКШ, Түркия жана Венгриядан аскердик байкоочулар, ошондой эле ЕККУ өкүлү келгенин билдирди. Ведомство америкалык офицерлер министр Виктор Хренинге чакыруусу үчүн ыраазычылык айтып жаткан видеону жарыялады.
«Батыш-2025» машыгуулары 12–16-сентябрь аралыгында өтүп жатат жана ага болжол менен 7000 аскер катышууда, анын ичинен 6000 — Беларусь, 1000 — Россия өкүлдөрү. Хрениндин айтымында, машыгуунун сценарийи «ядролук куралды колдонууну пландоону» жана «Орешник» ракета системасын колдонуу элементтерин камтыйт. Анын айтымында, бул чаралар республиканын чек арасындагы «милитаризацияга жооп» болуп саналат.



















