Германияда куш тумоосунан улам жумуртка тартыштыгы күчөп, ири шаарлардагы дүкөндөрдө калган жумурткалар кымбат баада сатылууда.
Бул тууралуу SHOT Telegram каналы билдирди.
Булактын маалыматы боюнча, Берлиндеги дүкөндөрдүн текчелери бош болгондуктан, тургундар жумуртка сатып алуу үчүн шаар четине барууга аргасыз болушкан. Борбор калаанын дүкөндөрүндө калган жумурткалар кадимкидей 2-3 евродон эмес, 8 евродон сатылып жатат.
Адистердин айтымында, Германиядагы жумуртка тартыштыгы куш тумоосунун эпидемиясынан улам келип чыгууда. Жергиликтүү бийлик бир жуманын ичинде кырдаал жакшырат деп убада кылууда.
Германияда өткөн жылдан бери куш тумоосу күчөп келет. Тактап айтканда, сентябрь айынан бери Бранденбургдагы канаттуулар фермаларында вирустук инфекциянын 18 очогу катталган. Бийлик фермерлерге 2,5 миллион евро компенсация төлөп берди. Он төрт муниципалитет “коркунучтуулугу бир топ жогорулаган аймактар” деп жарыяланды жана ал жерде жаныбарларды эркин багууга тыюу салынды.
