Жогорку Кеңештин төрагасы Марлен Маматалиев баштаган делегациянын Германияга болгон расмий иш сапарынын алкагында бир катар маанилүү жолугушуулар өттү. Бул тууралуу Парламенттин маалымат кызматы билдирди.
Алгач Бундестагдын Президенти Юлия Клёкнер менен жолугушууда тараптар саясий-экономикалык жана парламенттик кызматташтыкты кеңейтүү маселелерин талкуулашты.
Андан соң Бранденбург парламентинин башчысы Ульрике Лидтке менен жолугушууда аймактык деңгээлдеги кызматташтык жана тажрыйба алмашуу маселелери көтөрүлдү.
“2025-жылдын февраль айынан бери Бишкекте Германиянын академиялык алмашуу кызматынын аймактык өкүлчүлүгү иштеп, жаштарыбыз үчүн жаңы мүмкүнчүлүктөр ачылууда. Эми Бранденбург федералдык аймагындагы университеттер менен Кыргызстандын жогорку окуу жайларынын ортосунда түз байланыштарды түзүп, биргелешкен илимий изилдөөлөрдү жүргүзүү жана кош дипломдук программаларын өнүктүрүү маанилүү деп эсептейм”, – деди төрага.
Мындан тышкары, М. Мамталиев Саксониянын өкүлү Маркус Франке менен жолугушууда билим берүү, инвестиция жана аймактар аралык байланыштарды өнүктүрүү багыттары талкууланды. Жыйынтыгында тараптар кызматташууну мындан ары да тереңдетүүгө даяр экенин билдиришти.
Эскерте кетсек, Жогорку Кеңештин төрагасы Германияга болгон расмий иш сапарына чейин Түркияга расмий сапар менен барып, Улуу Улуттук жыйынынын төрагасы Нуман Куртулмуш менен жолугушкан.




















