Өзбекстандын футбол боюнча курама командасы CAFA Nations Cup турниринде (Борбор азиялык футбол ассоциациясы) жеңүүчү болду.
Финалда Өзбекстан Ирандын командасын 1:0 эсебинде жеңип алды. Жеңиш алып келген жалгыз голду Хожиакбар Алижонов оюндун 119-мүнөтүндө киргизди.
Оюн 8-сентябрда Ташкенттеги жаңы “Олимпик” стадионунда болуп өттү.
Өзбекстандык футболчулар негизги убакытта гол киргизе алышкан жок. Негизги оюн 0:0 эсеби менен жыйынтыкталды.
Оюн кошумча таймдарга өттү. 109-мүнөттө капитан Элдор Шомуродов пенальтиден гол киргизе албай, топту дарбазанын үстүнө тепти. Чечүүчү учур 119-мүнөттө келди — коргоочу Хожиакбар Алижонов топту баш менен дарбазага багыттап, Өзбекстанга жеңиш алып келди.
Ошентип, Өзбекстан курама командасы CAFA Nations Cup 2025 турниринин жеңүүчүсү болду. Тайпалык этапта алар Түркмөнстанды (2:1) жана Кыргызстанды (4:0) утуп, Оман менен (1:0) тең чыккан болчу.
Футболчуларга сыйлыктарды жана кубокту өлкө президенти Шавкат Мирзиеев тапшырды. Салтанатка ФИФАнын президенти Жанни Инфантино жана башка расмий адамдар да катышты.
Эске салсак, 2023-жылы биринчи жолу өткөрүлгөн CAFA Nation”s Cup турниринде (Борбор азиялык футбол ассоциациясы) Ирандын курама командасы биринчи жеңүүчү болгон. Анда финалда Иран Өзбекстандын командасын жеңип алган.
Коло байге үчүн беттеш
Ушул эле күнү Тажикстандын Гиссар шаарында “Марказий” стадионунда коло медаль үчүн да беттеш болду. Анда Индия омандыктарды 3:2 эсеби менен жеңип, коло байгеге ээ болду.
Оюндун негизги убактысы 1:1 эсеби менен аяктап, индиялык футболчулар пенальтиде жеңишке жетишти. Карлуш Кейруш жетектеген Оман 4-орунду ээледи.
CAFA Nations Cup турнири
CAFA Nations Cup тарыхта экинчи жолу сегиз команданын – CAFAнын алты мүчөсүнүн (Кыргызстан, Тажикстан, Түркмөнстан, Өзбекстан, Афганистан жана Иран), ошондой эле Оман менен Индиянын курама командаларынын катышуусунда өттү. Командалар эки топко бөлүнгөн. “А” тайпасынын оюндары Өзбекстанда (Ташкент), “В” тайпасынын оюндары Тажикстанда (Гиссар) өттү.
Иран турнирдин “В” тайпасында Индия, Ооганстан жана Тажикстан курамалары менен бирге орун алган. Ал эми “А” таймасында Кыргызстан, Оман, Түркмөнстан, Өзбекстан курамалары орун алган.

















