Pars Today агенттиги IRNA маалымат агенттигине шилтеме берүү менен билдиргендей, Европада болуп көрбөгөндөй аптаптуу ысык уланып, бир катар өлкөлөрдө жаңы температуралык рекорддор катталууда. Франциянын саламаттык сактоо органдары бул ысык башталгандан бери өлкөдө болжол менен 1000 адам каза болгонун маалымдашты.
Франциянын саламаттык сактоо кызматы жекшемби күнү акыркы апталардагы катуу ысыктан улам каза болгондордун саны миңге жакындаганын билдирди.
Адистердин айтымында, медициналык маалыматтарды толуктоо жана өлүм тууралуу күбөлүктөрдү акыркы каттоо аяктагандан кийин бул көрсөткүч дагы өсүшү мүмкүн.
Мекеменин маалыматына ылайык, жабыркагандардын арасында улгайган адамдар, өнөкөт оорулары бар бейтаптар жана өтө жогорку температурага сезимтал адамдар көп.
Расмий өкүлдөрдүн айтымында, узакка созулган ысык калктын ден соолугуна олуттуу терс таасирин тийгизип гана тим болбостон, ооруканаларга, медициналык борборлорго жана тез жардам кызматтарына чоң күч келтирди.
Быйыл аптаптуу ысык Европанын кеңири аймагын каптап, көптөгөн өлкөлөрдө жаңы температуралык рекорддор жаңырды.
Францияда, Испанияда, Италияда, Германияда, Португалияда, Польшада жана башка бир катар өлкөлөрдүн айрым аймактарында абанын температурасы 40°Cден ашты. Буга байланыштуу жергиликтүү бийлик жарандардын коопсуздугун камсыз кылуу үчүн эң жогорку деңгээлдеги эскертүүлөрдү жарыялады.
Германияда синоптиктер рекорддук ысык тууралуу эскертип, пляждар менен эс алуу жайлары салкын жер издеген адамдарга жык толгонун билдиришти.
Ошол эле учурда Түштүк жана Борбордук Европанын чоң бөлүгүндө токой өрттөрүнүн чыгуу коркунучу кескин жогорулады.
Адистердин эскертүүсүнө ылайык, мындай болуп көрбөгөндөй ысык адам өмүрүнүн көбүрөөк кыйылышына гана эмес, айыл чарбасына, суу ресурстарына, электр энергиясын өндүрүүгө, транспорт тармагына жана Европа өлкөлөрүнүн экономикасына да олуттуу терс таасирин тийгизиши мүмкүн.



















