Евробиримдик Орусияга таандык активдерден түшкөн 1,4 миллиард евро кирешени Украинага которуу чечимин жактырганын европалык дипломатиянын башчысы Жозеп Боррелл билдирди.
«Кийинки айда 1,4 миллиард евро которулат. Жакынкы айларда дагы миллиард которулат. Бул учурда биз вето менен түзүмдүк көйгөйдү жеңе алдык», – деди Боррелл расмий Евробиримдиктин мүчөлөрүнүн жолугушуусунун жыйынтыгында.
Кийинчерээк Голландиянын тышкы иштер министри Ханке Брюинз Слот бул каражат Украина үчүн артиллерия, ракета жана абадан коргонуу системаларын сатып алууга жумшала турганын тактады.
Майдын аягында Европа өлкөлөрү Орусиянын активдеринен түшкөн каражаттын 90%ын Украинага аскердик жардам көрсөтүүгө жана постсоветтик республиканы реконструкциялоо программаларына жумшоону макулдашты. Калган 10% потенциалдуу тобокелдиктерден улам борбордук депозитарийлерде убактылуу сакталышы мүмкүн.
Ошол эле маалда “Чоң жетилик” өлкөлөрү Киевге 50 миллиард доллар өлчөмүндө насыя берүүнү убада кылышты, ал акча тоңдурулган активдерден түшкөн каражаттын эсебинен кайтарылат.
Украинада согуш башталгандан кийин Евробиримдик жана G7 Орусиянын валюталык резервинин жарымына жакынын – болжол менен 300 миллиард еврону тоңдурду.
Москва Евробиримдикти уурулук үчүн айыптоодо. Тышкы иштер министри Сергей Лавров Орусия тараптан мүмкүн болгон жооп чаралары, анын ичинде батыштык каражаттардын кармалышы тууралуу эскерткен.



















