Азербайжан 19-сентябрда Карабакта аскерий операция баштагандан бери Ереванда өкмөткө каршы нааразылык акциялары басыла элек. Баш калаанын борборундагы Республика аянтында демонстранттар аймакты Азербайжандын бир бөлүгү деп тааныган премьер-министр Никол Пашиняндын кызматтан кетишин талап кылышууда.
Митингчилер менен полициянын ортосунда маал-маалы менен кагылышуулар болуп жатат.
Армениянын Тергөө комитети өткөн аптадан бери уланып жаткан акцияларда кармалгандардын ичинен 50гө жакын кишиге коомдук тартипти бузуу фактысы боюнча кылмыш ишин козгоду.
Бүгүн, 25-сентябрда да полиция Ереванда премьер-министр Никол Пашиняндын кызматтан кетишин талап кылган нааразылык акциясынын 168 катышуучусун кармаганын ИИМдин маалымат кызматыны шилтеме берүү менен Sputnik Армения жазды.
«Учурда 168 адам полиция бөлүмдөрүнө жеткирилди», – деп айтылат маалыматта.
Адвокат Арсен Бабаяндын айтымында, кармалгандардын арасында, Улуттук ассамблеянын депутаты Тадевос Аветисян да бар.
Митингчилер эртең мененден бери Еревандын көчөлөрүн бууп, шаардагы транспорттук каттамдарды токтотууга аракет кылышууда. Мындан тышкары, алар баш калаанын борборундагы бир нече көчөлөрдү бойлой колонна менен жүрүш жасашты. Армян оппозициясы кечинде да митинг өткөрүүгө чакырык жасаган.
19-сентябрда Азербайжан бийлиги “конституциялык түзүлүштү калыбына келтирүү” деген максатта Тоолуу Карабакта “антитеррордук операция” жарыялаган. Ереван муну агрессия катары мүнөздөп, Карабакта армян бөлүктөрү жок экенин билдирген. Бир күндөн кийин россиялык бейпилдик күчтөрүнүн ортомчулугу менен ок атышпоо боюнча келишимге жетишилген.
21-сентябрда Евлах шаарында Азербайжан бийлигинин өкүлдөрү менен Карабак армяндарынын жолугушуусу болуп, анын жүрүшүндө Карабакта жашаган армяндарды реинтеграциялоо маселелери талкууланганы маалымдалган.
