Бүгүн, 7-сентябрда Жогорку Кеңештин жыйынында жаңы окуу жылына карата китеп тартыштыгы боюнча маселе козголду.
Депутат Камила Талиева бул багыттагы ата-энелердин көйгөйүн айтты.
“Жаңы окуу жылынын башталганына бир топ күн болсо дагы көчөдө окуу китептерин издеп жүргөн ата-энелер толтура. Бул багыттагы көйгөйгө өкмөт олуттуу мамиле жасашы кажет. Кезегинде китеп чыгаруу мафиясы боюнча кылмыш иши ачылган, бирок бул көйгөйдү чечкен жок”- деди депутат.
Ал эми Айбек Маткеримов Каныбек Иманалиев Билим берүү жана илим министри болуп дайындалганда бардык мектептерди окуу китептери менен камсыз кылууну убада кылганын белгиледи.
«Коомдо бөлүнүү жаралууда. Окуу китептерин кээ бирөөлөр сатып ала алат, кээ бирөөлөр ала албайт. Социалдык жактан аялуу катмардагы көп балалуу үй-бүлөлөр балдарын окуу адабияттары менен камсыз кыла алышпайт. Алар кайдан, кайсы каражатка алат?”, – деди ал.
Эл депутаты Айбек Осмонов Ош шаарында ата-энелерге окуу китептерин «Аркус» басмасынан гана сатып алуу айтылганын билдирди.
«Бул мафия. Китептер жок, ата-энелер базарлардан издеп жүрүшөт. Жардам берели», – деди ал.
Ал эми Мирлан Самойкожо айлыктын бир бөлүгүн китеп басып чыгарууга бөлүүнү сунуштады.
Эрулан Көкүлов болсо бүгүнкү күндө мектептерден китеп табуу – Нарын дарыясынан крокодил тапкандай эле экенин айтты.
Депутат Миргүл Темирбаева Лейлек районунун мектептеринде окуучуларды китеп менен камсыз кылуунун жетишсиз деңгээлине көңүл бурду.
Анын айтымында, мектеп окуучуларынын 83%ы гана керектүү окуу материалдарына ээ.
«Окуу куралдарын сатып алууга 2023-жылы 152 млн сом, 2022-жылы 65 млн сом бөлүнгөн. Бирок, 2019-2021-жылдар аралыгында Лейлек районуна белгисиз себептерден улам китептер бөлүнбөй калган», – деди.
Депутат белгилегендей, ата-энелер китептерди ижарага алууга аргасыз болуп, бул алардын үй-бүлөлүк бюджетине кошумча оорчулук келтирүүдө.
«Албетте, окуу материалдарынын жетишсиздиги билим сапатынын төмөндөшүнө алып келет, натыйжада мектеп бүтүрүүчүлөр жалпы республикалык тестирлөөдөн өтүүдө жана бюджеттик бөлүмдөргө тапшырууда кыйынчылыктарга дуушар болушууда», – деди Темирбаева.
