Уругвайдын мурдагы лидери Хосе Мухика 89 жашында көз жумду. Ал өзүнүн жупуну жашоо образынан улам “дүйнөдөгү эң жакыр президент” деген лакап атка ээ болгон. Ал өлкөнү башкарып турганда айлыгын дээрлик толугу менен кайрымдуулукка жумшаган. 2024-жылы Мухика рак оорусуна чалдыккан.
Дүйнөдөгү эң кедей мамлекет башчысы аталган Уругвайдын мурдагы президенти Хосе Мухика каза болгонун Уругвайдын лидери Яманду Орси X социалдык тармагында билдирди.
“Кесиптешибиз Пепе Мухиканын каза болгонун катуу кайгыруу менен билдиребиз. Президент, активист, лидер… Бизге берген бардык нерсеңиз үчүн жана элиңизге болгон терең сүйүүңүз үчүн рахмат”, — деп жазган президент.
Мухика кызыл өңгөчтүн рагы менен ооруп, башка органдарга метастаз берген. Жыл башында дарылануудан баш тартып, мекендештери менен коштошкон.
Хосе Альберто Мухика Кордано 2010-2015-жылдары Уругвайдын президенти болгон. Экс-президент дүйнө жүзү боюнча кеңири белгилүү, аны өзү таандык болгон солчул саясатчылар гана эмес, оңчул көз караштагы адамдар да сыйлашат. Мухика дүйнөдөгү эң жакыр президент деп аталган. Ал дайыма элеттик үйүндө жашап, мамлекет башчысы болуп туруп, айлыгын кайрымдуулукка жумшап, анын ондон бир бөлүгүнө ыраазы болгон. Ал президент болуп шайланган маалда анын жалгыз мүлкү 1987-жылы чыккан Volkswagen Beetle болгон. 2014-жылы ага унаасын 1 миллион долларга сатуу сунушталган, бирок Мухика баш тарткан.
Ал 2015-жылы президенттик кызматтан кетип, андан кийин Сенатка (Улуттук Ассамблеянын жогорку палатасы) шайланган, бирок 2018-жылдын башында мөөнөтүнөн мурда кызматтан кеткен. Сенаттан кеткенден кийин ал сенаторунун пенсиясынан да баш тарткан.
Мухика өзүнүн токсон жылдыгына бир нече күн калганда дүйнө салды.



















