Бүгүн кыргыз-тажик чек арасында зым тартуу иштери башталды. Бул күндү баткенчилер Эгемендик колго тийген күндөн бери күтүп келишкен. Айрыкча, дал ошол чек ара тилкесинде жайгашкан айылдардын өзүндө жашаган мекендештер үчүн бул өзгөчө окуя, анткени, артта канчалаган уйкусуз түндөр, кайгылуу окуялар калды.
Мылтыгын кучактап уктаган адаттан мына эми кутула башташат. Мамлекет алсыз кезде бир метр жерибизди бербей, кыйынчылыктарга карабастан душмандын катыгын берип келишти. Мына ошол карапайым адамдарды чыныгы баатыр десек адашпайбыз.
Эми баягы алсыз мамлекет жок. Азыр Кыргыз мамлекети бутуна туруп, элине чындап кам көрө баштады. 33 жылдан бери жыдып бүтпөй келе жаткан чек ара маселесин азыркы бийлик кыска, үч жыл аралыгында чечти.
Бирок…
Бирок, эмнегедир бүгүнкү тарыхый окуяга чындап кубанып, сүйүнчүлөп, төш каккан кыргыз аз… Баткенде кандуу окуялар кезеңинде диванда жатып алып акыл үйрөткөн жарма патриоттор азыр кайда? “Бизди Баткенге жибергиле! Биз согушабыз!”- деп аянтка чогулуп, алардын талабын аткаруу үчүн автобус жиберишкенде бири калбай качып жоголгондой, азыр да бурчта жашынып отурушабы?
Чек ара маселесин азыркы бийлик чечүүгө аракет кылып жатышканда буттан чалып жыгытканга далбастагандар чыккан. Акыл үйрөтүп, акылдуу болгондор андан көп эле. Бирок, алардын бири да кыргыз элин чындап эгемендүү болгону менен куттуктап койгонго жараган жок.
“Чек ара чечилсе өзүм зым тартып берем!”- деген акылдуулар, байманасы ашып-ташкан манаптар кайда? Баарын кайрадан мамлекет өзү колго алып, бул ишти баштады. Үн каткылачы, ким мамлекетке жардам бере алат, ушундай учурда?
Баткенчилерге мына ушул кереметтүү көз ирмемди тартуулаган Кыргыз Республикасынын Президенти Садыр Жапаров менен Кыргыз Эл Баатыры, КР Министрлер кабинетинин төрагасынын орун басары, УКМК төрагасы Камчыбек Ташиевге терең ыраазычылык! Эки доско таазим, азаматсыздар, элдин алкышына арзыдыңыздар, тарыхта бул иштериңиздер алтын тамгалар менен жазылып калаарынан шек жок!
Нургазы Анаркулов,
(макала автордун ФБдагы барагынан алынды жана өзгөртүүсүз берилди)
