Чехиянын борбору Прага шаарында SPD (Svoboda a přímá demokracie) саясий кыймылынын өкүлү Сергей Зуев жана белгилүү чех саясатчысы Милан Урбандын уюштуруучулук колдоосу менен эл аралык тегерек стол өткөрүлдү. Ага Кыргызстан, Азербайжан, Казакстан, Пакистан, Афганистан, Россия, Украина жана Чехиянын коомдук, маданий жана саясий уюмдардын өкүлдөрү катышты.
Бул тууралуу Чехиядагы ардактуу консул Саадаткан Даминова “Евразия Тудей” агенттигине билдирди.
“Прага шаарынын мэриясынын кеңсесинде “Маданияттар аралык мамилелер жана этникалык азчылыктардын Чехиянын өкмөттүк органдары менен өз ара аракеттенүүсү” деген темада тегерек стол өттү. Бул иш чарага улуттук коомчулуктардын, коомдук уюмдардын өкүлдөрү жана Чехияда жашаган ар кандай этникалык топтордун ортосундагы маданияттар аралык диалогду өнүктүрүүгө жана кызматташтыкты бекемдөөгө кызыкдар эксперттер катышты.
Жолугушуу SPD саясий кыймылынын өкүлү Сергей Зуев жана чех саясатчысы Милан Урбандын колдоосу менен демилгеленди”, – деди Саадаткан Даминова.
Анын айтымына караганда, Прагадагы бул эл аралык иш чарага Борбор Азия мамлекеттери, анын ичинде Кыргызстандын Чехиядагы кыргыз диаспорасынын өкүлдөрү жана чехиялык коомдук, маданий жана саясий уюмдардын өкүлдөрү катышкан.
“Талкуунун негизги темасы – улуттук азчылыктардын мамлекеттик жана муниципалдык бийлик органдары менен өз ара аракеттенүүсү, ошондой эле ар кандай коомчулуктардын өкүлдөрүнүн ортосундагы кызматташуунун натыйжалуу механизмдерин издөө болду”, – деп кошумчалады ал.
Иш чарага катышкандар маданий жана коомдук демилгелерди ишке ашыруу боюнча тажрыйба алмашып, маданияттар аралык диалогду кеңейтүү жана Чехия коомунда өз ара түшүнүшүүнү бекемдөө мүмкүнчүлүктөрүн талкуулашкан.

Мындан тышкары, улуттук коомчулуктардын маданий мурасын сактоого, билим берүү демилгелерин өнүктүрүүгө жана өлкөнүн коомдук жашоосуна этникалык азчылыктардын активдүү катышуусу үчүн шарттарды түзүүгө багытталган долбоорлорду колдоого өзгөчө көңүл бурулган.
“Азыркы коом мамлекеттик мекемелер менен улуттук коомчулуктардын ортосунда ачык диалогду талап кылат. Мындай жолугушуулар бизге учурдагы көйгөйлөрдү талкуулоого гана эмес, өз ара урматтоого жана кызматташууга негизделген чечимдерди биргелешип издөөгө да мүмкүндүк берет”, – деп белгилеген чехиялык саясатчы Милан Урбан.
Ал эми SPD өкүлү Сергей Зуев, өз ара аракеттенүүнүн бул форматы коомдук ынтымакты чыңдоого жана маданияттар аралык түшүнүшүүнү өнүктүрүүгө салым кошорун баса белгилеген.
“Биздин максатыбыз – ар кандай улуттардын өкүлдөрүнүн, коомдук уюмдардын жана мамлекеттик органдардын ортосунда конструктивдүү кызматташуу үчүн мейкиндик түзүү “, – деген ал.
Уюм биргелешкен долбоорлорду координациялоо, маданий алмашууну илгерилетүү жана улуттук коомчулуктардын кызыкчылыктарына тиешелүү маселелер боюнча мамлекеттик мекемелер менен өз ара аракеттенүү үчүн платформага айланышы күтүлүүдө.


















