Күндө пайда болгон ири короналдык тешиктин айынан Жерди күчтүү магниттик бороон-чапкындар каптайт.
Бул тууралуу Россия Илимдер академиясынын Космостук изилдөөлөр институту жана Күн-Жер физикасы институту маалымдаганын Iz.ru маалымат агенттиги билдирди.
Божомолдорго ылайык, дүйшөмбү, 21-апрель кечинде Күндүн активдүүлүгү кескин жогорулайт. Магниттик бороондун күчтүү болушунун ыктымалдыгы 80%га чейин жетиши мүмкүн.
Институттун Telegram-каналында төмөнкүдөй маалымат берилген:
«Учурда тешиктин өлчөмү азыркы деңгээлде калса, бороондордун узактыгы салыштырмалуу кыска болот деп күтүлүүдө — дүйшөмбүдөн шейшембиге чейин эки сутка. Бирок терс сценарийде бул мезгил шаршембинин айрым бөлүгүн да камтышы мүмкүн».
Мындай магниттик активдүүлүк адамдардын ден соолугуна жана байланыш системаларына таасир этиши ыктымал.



















