Бишкек шаарында Шанхай кызматташтык уюмуна (ШКУ) мүчө мамлекеттердин башкы прокурорлорунун 22-жыйыны болуп өттү. Бул тууралуу Башкы прокуратурадан билдиришти.
Отурумдун жүрүшүндө Россия, Кытай, Казакстан, Өзбекстан, Тажикстан, Индия, Пакистан, Иран Ислам Республикасынын, Беларустун башкы прокурорлору, ошондой эле ШКУ катчылыгынын жана ШКУнун аймактык антитеррористтик түзүмүнүн жетекчилери презентациялар жана докладдар менен чыгып баяндама жасашты.
Жыйын “Заманбап дүйнөдө жана санарип доорунда прокуратуранын ролу: жаңы коркунучтарга каршы турууда жана адам укуктарын камсыздоодо ШКУ өлкөлөрүнүн тажрыйбасы” деген темага арналды.
Иш-чаранын жүрүшүндө ШКУга мүчө бардык өлкөлөрдүн башкы прокурорлору жолугушуунун жыйынтыгын чыгарып, мындан аркы кызматташуунун негизги багыттары чагылдырылган отурумдун протоколуна кол коюшту.
Кол коюлган протокол ШКУга мүчө өлкөлөрдүн башкы прокуратураларынын ортосундагы өз ара аракеттенүүнү күчөтүү боюнча макулдашылган чараларды, ошондой эле аймактагы укук тартибин жана коопсуздукту жакшыртуу боюнча стратегияларды камтыйт.
Быйылкы отурум Кыргызстандын Башкы прокуратурасынын төрагалыгы астында өттү.
ШКУга мүчө өлкөлөрдүн башкы прокурорлорунун кезектеги жыйынына төрагалык кылуу Пакистанга өткөрүп берилди.

















