Бишкекте 23-январдан 25не чейин Иран кинолорунун күндөрү өтөт. Бул тууралуу Ирандын Кыргызстандагы элчилигинин алдындагы Маданий өкүлчүлүктөн билдиришти.
Аталган иш-чараны Ирандын Маданий өкүлчүлүгү КР Маданият, маалымат, спорт жана жаштар саясаты министрлигине караштуу Кинематография департаменти менен биргеликте маданият жана кинематография тармагындагы кызматташтыктын алкагында уюштурууда.
Программада 2017-2022-жылдар аралыгында тартылган Ирандын заманбап кинорежиссёрлорунун беш тасмасы бар. Үч күндүн ичинде борбор калаанын тургундарына түрдүү жанрдагы, анын ичинде дүйнөлүк кинофестивалдарда бааланган тасмалар тартууланат.
Иш-чаранын расмий ачылышы 23-январда саат 14:00дө “Манас” кинотеатрынын чоң залында болот. Ачылышта «Ангел надежды» тасмасы көрсөтүлөт.
Көрүүчүлөргө Ирандын төмөнкүдөй тасмалары тартууланат:
- «Сара и Аида» / «Sara vа Ayda», режиссёру Мазия́р Мири́, экранга 2017-жылы чыккан (драма үй-бүлө жана мамиле темасын ачып берет);

- «Виллы» / «Vilaeiha», режиссёру Мони́р Гейди́, 2017-жылы тартылган (аскердик драма);

- «Хенас» / «Henas», режиссёру Хосейн Дараби, 2022-жылы экранга чыккан (биографиялык драма);

- «Романтическая история Эмада и Тубы» / «Romantism Emad va Tooba», режиссёру Каве́ Сабагзаде́, 2019-жылы тартылган (мелодрама, романтикалык комедия);

- «Ангел надежды» / «Loupetoo»,режиссёру Абба́с Аскари́, экранга 2022-жылы чыккан (комедия, укмуштуу окуялар, анимациялык мюзикл).

Тасмалардын күнү жана убактысы Ирандын Маданий өкүлчүлүгүнүн жана КР Маданият, маалымат, спорт жана жаштар саясаты министрлигине караштуу Кинематография департаментинин расмий сайттарында жана социалдык тармактардагы баракчаларында жарыяланат.
Тасмалар «Манас» кинотеатрында орус тилинде көрсөтүлөт. Кирүү акысыз.















