“Белес” ишканасынын башкы директору Аскалиев Мирбек ишкана Россия менен Кытайдан чыгарылган брондолгон унаалардан кем калбаган, унааларды чыгарууга даяр экенин билдирди.
Анын айтымында, дүйнөдөгү акыркы кырдаалдарга байланыштуу брондолгон унааларга суроо-талап жогорулап, мындай унаа чыгаруучу заводдорго буйрутмалар көп болуп, баалар өсүп, мындай техникаларды чыгарган өлкөлөр башка мамлекеттерге сатууга да чектөлөрдү киргизип жатат.
Ал соцтармактагы баракчасына аскердик унаанын эскиз сүрөтүн жарыялап, өлкө жетекчилигине брондолгон унааларга мамлекеттик деңгээлде буйрутма кылуу өтүнүчү менен кайрылды.
“Урматтуу Жапаров Садыр Нургожоевич, Жапаров Акылбек Үсөнбекович, Ташиев Камчыбек Кыдыршаевич!
Өзүңөргө белгилүү болгондой “Белес” ишканасы дүйнөлүк унаа өндүрүчүлөр тарабынан таанылган, өлкөбүздүн алгачкы унаа чыгарчу ишканасы. Бир жарым жыл мурун “BELES UMUT 12″ маркасындагы алгачкы автобусту жасап, сиздердин, элдин сынына коюп, калктын алкоосуна татыганбыз.
Ишкананын беш жылдык планында коргону унааларды ж.б. техникаларды чыгаруу бар. Ал да болсо өлкөбүздүн коопсуздугун сактоого салым кошуу максатында кирген.
Үч жыл эмгектенип жогорудагы В6/В7 (4 класс коргонуу) бронь унаанын конструктордук документтерин, чиймелерин (чертеж) керектелүүчү тетиктерди чыгаруучу заводдор менен жүргүзүлүп жаткан келишимдер аяктап калган учурубуз. Азыркы тапта биздин ишкана ишсиз отурган кези. Биздин ишканага мамлекеттик деңгээлде буйрутма кылсаңар Россия менен Кытайдан чыгарылган брондолгон унаалардан кем калбаган, бронь унаа чыгарууга даяр экенибизди жоопкерчиликти мойнума алып туруп айта алам.
Аскердик унаа болгон себептен эскиз сүрөтүн жарыяладым, кандай курал жарак жабдыктар менен жабдылары сыр болот. Ал сырды атайын адистериңиздерге гана чечмелеп айтып беребиз. Кудай буюруп, мамлекет тараптан буйрук берсеңиздер Ата Мекендик өндүрүштөн чыккан атайын бронь авто унаалар өлкөбүздүн чек арасын коргоого татыктуу кызмат кылаарына ишендирип кетем”, – деп жазды Аскалиев.
