BBCнин башкы директору Тим Дэйви жана BBC News бөлүмүнүн башчысы Дебора Тернесс АКШнын президенти Дональд Трамптын сөзүн туура эмес монтаждоо боюнча айыптоолордон кийин кызматтан кетишти. Буга 2024-жылдын октябрь айында көрсөтүлгөн программа себеп болгон.
Тим Дэйви BBCде жалпысынан 20 жыл иштеп, анын ичинен беш жолу башкы директор болгондугун kommersant.ru басылмасы жазды.
“Президент Трамп жөнүндөгү Panorama программасынын айланасындагы уланып жаткан талаш-тартыштар BBCге зыян келтире турган деңгээлге жетти”, – деди Дебора Тернесс.
Белгиленгендей, ал ката үчүн жоопкерчиликти мойнуна алды, бирок ал BBC Newsке карата бир жактуулук боюнча айыптоолорду четке какты.
Кеп болуп жаткан программа BBC тарабынан 2024-жылдын октябрь айында көрсөтүлгөн.
Буга чейин The Telegraph гезити мурдагы журналист Майкл Прескотт тарабынан жазылган жана BBCнин директорлор кеңешине жөнөтүлгөн эскертүүнү жарыялаган. Анда телекомпания Трамптын 2021-жылдын 6-январында Капитолийге чабуул коюу алдында сүйлөгөн сөзүн бурмалаган деп айтылган.
Эскерте кетсек, 2021-жылдын 6-январында Трамптын шайлоодогу жеңилүүсүнөн эки ай өткөндөн кийин, республикачылардын жактоочулары Капитолий имаратына басып киришкен. Жыйынтыгында эки тараптын кагылышуусунан 5 адам каза болуп, 140 полиция кызматкери жаракат алган. Дональд Трамп кийинчерээк кол салууну айыптаган.
Бул окуялардан кийин Трампка каршы бир нече кылмыш иштери козголуп, алардын баары ал кызматка киришкенден кийин токтотулган.
Трамп 2025-жылы президент катары 6-январдагы нааразычылык акцияларына катышкан 1000ден ашык америкалыкты кечирген.
















