Немис археологдору Балтика деңизинин Мекленбург булуңунан сенсациялуу ачылыш жасашкандыгын DW маалымат булагы билдирди.
Окумуштуулар суунун 21 метр тереңинен узундугу бир километрге жакын 11 миң жылга жакын убакыт мурда курулган таш дубалды табышкан. Изилдөөнүн авторлору бул курулушту акыркы муз мезгилинин – палеолит доорунун аягы же мезолит доорунун башталышында мергенчилер тургузган деп эсептешет.
Божомолдорго ылайык, дубалдын жалпы массасы 140 тоннадан жогору. Ал суунун астында 8500 жылдай мурда деңиздин деңгээли көтөрүлүүсүнүн натыйжасында калып калган.
Окумуштуулардын алдын ала айтуусу боюнча, дубал таш кылымы доорундагы адамдар тарабынан түндүк бугулары миграцияланган учурда аларга аңчылык кылуу үчүн колдонулган. Бул мезгилде бүтүндөй Түндүк Европада болгону беш миңге жакын адам жашаган.
Дубал Европа континентиндеги байыркы монументалдык курулуш болушу мүмкүн. Авторлор бул түзүлүш табигый жаратылыштын кубулуштарынан же адамдардын кийинки ишмердүүлүгүнөн пайда болушу мүмкүн экендигин жокко чыгарышууда.
Окумуштуулар бул дубалдын алгачкы белгилерин 2021-жылы Мекленбург булуңун гидроакустикалык изилдөө учурунда кокустан эле байкашкан.





















