Азия чемпионаты: Кыргызстандык балбан кыздар жалпы 3 медаль утушту

Казакстандын борбору Астана шаарында өтүп жаткан кыз-келиндер күрөшү боюнча Азия чемпионатында Кыргызстандын кыз-келиндер курама командасы бир алтын, бир күмүш жана бир коло байгеге ээ болушту.

Кечээ, 12-апрелде балбан Айсулуу Тыныбекова алтын байге утуп, Азиянын беш жолку чемпиону болду.

Тема боюнча:

Кыргызстан Азия оюндарында 18-орунду ээледи

10.10.2023

Буга чейин 76 килограмм салмакта күч сынашкан Айпери Медет кызы күмүш медаль жеңген. Ал чейрек финалда индиялык Прия Прияны 4:0 эсебинде, жарым финалда япониялык Мизуки Нагашиманы 3:2 эсебинде утуп алды. Финалда казакстандык Элмира Сыздыковага жеңилип, 2-орунду ээледи.

Ал эми 59 килограмм салмакта килемге чыккан Калмира Билимбек кызы коло медаль багындырды. Балбан кыз казакстандык спортчу Диана Каюмованы утуп, үчүнчү орунду камсыздады.

Мээрим Жуманазарова коло үчүн беттеште казакстандык Елена Шалыгина менен кез келип, бирок ал күрөшүп жатканда жаракат алып, таймашты уланта алган жок. Натыйжада жеңиш Шалыгинага ыйгарылды.

Командалык көрсөткүчтө Япония, Кытай жана Индия командалары мыкты деп табылды.

Президенттин куттуктоосу

Президент Садыр Жапаров Астанада өтүп жаткан күрөш боюнча Азия чемпионатында байге алган балбан кыздарды куттуктады.

«Кыздарыбыз да мыкты, күйөрмандарынын купулуна толгон күрөш көрсөттү.

Айсулуу Тыныбекова Азия чемпионатында өзүнүн эң мыктылыгын бешинчи ирет жеңүүчү болуп далилдеди.

Күмүш алган Айпери Медет кызын, коло медаль алган Калмира Билимбекованы чоң спорттогу бул ийгиликтери менен куттуктайм! Сиздер бүгүнкү күндүн Жаңыл Мырзасысыздар. Силерге карап миңдеген сиңдилериңер спортко кызыгып, максат коё билүүнү үйрөнөт. Албетте, Мээрим Жуманазарова баш болгон башка балбан кыздарыбыз багынта турган жеңиштер алдыда. Андыктан алар машыгууларына жаңы дем күч менен кайтып келет деп ишенебиз», — деп жазга мамлекет башчысы соцтармактагы баракчасына.

Жапаров ошондой эле учурдан пайдаланып спортчулардын машыктыруучулар курамына да ыраазычылык билдирип, алдыда килемге чыга турган эркин күрөш боюнча балбандарга ийгилик каалап өттү.

Эске салсак, буга чейин Азия чемпионатында грек-рим күрөшү боюнча беттештер жыйынтыкталган. Кыргызстандык балбандар 3 алтын, 1 күмүш, 3 коло медалга ээ болушуп, командалык көрсөткүчтө экинчи орунга илинген.