Сауд Аравиядагы ажылык сапар учурунда иорданиялык 14 зыяратчы каза болду.
Бул тууралуу Reuters агенттиги Иорданиянын Тышкы иштер министрлигине шилтеме берүү менен билдирди.
Маалыматка караганда, зыяратчылардын кеминде алтоосу ысыктан улам каза болгон. Дагы 17 адам дайынсыз болууда.
Иорданиянын Тышкы иштер министрлиги Сауд бийликтери менен биргеликте каза болгондордун сөөгүн үй-бүлөлөрүнүн каалоосуна ылайык жерге берүүнү жана жеткирүүнү уюштурду.
17-июнь күнү кечинде Меккеде абанын температурасы плюс 47°Сге жеткенин ЖМКлар жазышты.
Буга чейин Сауд Аравиянын Саламаттыкты сактоо министрлиги абанын температурасы кескин көтөрүлөрүн эскертип, зыяратчыларды саат 11:00дөн 15:00гө чейин көчөгө чыкпоону суранган.
Ажылык – ислам дининдеги негизги беш парздын бири. Бул учурда дүйнөнүн булуң-бурчунан мусулмандар Сауд Аравиясынын Мекке жана Медина шаарларына зыяратка барышат.
14-июнда башталган ажылык амалдары 19-июнь күнү аяктайт.
Белгилей кетсек, Сауд Аравия быйыл Кыргызстанга 6060 квота бөлгөн.



















