Алматы шаарында 23-январга караган түнү болгон жер титирөөдө жабыркагандардын саны 67ге жетти, алардын 12си балдар экенин Алматынын коомдук саламаттыкты сактоо башкармалыгынан билдиришкенин “Sputnik Казакстан” жазды.
“Медициналык жардам сурап 67 адам кайрылган. Алардын 55и чоңдор, 12си балдар”, — деп айтылат маалыматта.
Ведомстводон билдиришкендей, сегиз адам ооруканага жаткырылганын (үч чоң адам жана 5 бала), калган бейтаптар бардык керектүү текшерүүлөрдөн кийин амбулатордук дарылоого жөнөтүлгөн.
Бейтаптардын бири операциядан кийин реанимацияда жатат, анын абалы оор деп бааланууда.
Ошондой эле травматология жана ортопедия бөлүмүнө жаткырылган эки кишинин абалы орточо оор болууда. Мындан тышкары, алты жана жети айлык эки ымыркай, 7 жана 16 жаштагы эки бала да ооруканада жатат. Алар жаракаттарды үйдөн, жыгылганда алышкан. Ымыркайлардын бирин энеси колунан түшүрүп алып, экинчиси керебеттен кулаган. Бардык балдардын абалы орточо оор, туруктуу деп бааланууда.
Балдар нейрохирургия жана травматология бөлүмүндө дарыланууда.
23-январга караган түнү Алматы шаарында болгон жер титирөөнүн күчү 5 баллга жеткен. Жер силкинүү Казакстандын башка да шаарларында сезилген.



















