Афганистанда болгон жер титирөөнүн кесепетинен кеминде 250 адам каза болуп, 500дөн ашуун адам жаракат алды, – деп кабарлады NBC телеканалы жергиликтүү бийликке шилтеме берип.
Телеканалдын маалыматына караганда, Афганистандын Саламаттыкты сактоо министрлигинин басма сөз катчысы Шарафат Заман бийлик чоң көлөмдөгү куткаруу операциясын баштап, жабыркагандарга жардам берүү үчүн жүздөгөн адамдарды мобилизациялаганын билдирди.
Ал эми Tolo News маалымат агенттиги провинциялык табигый кырсыктарга даярдык башкармалыгынын өкүлүнө шилтеме жасап, жер титирөөдөн эң көп жабыркаган райондор Нургал, Цавкай, Ватапур, Манугай жана Чапа-Дара экенин жазды.

«Жер титирөөнүн кесепетинен Нургал районундагы бир нече айыл жер алдында калып, болжол менен жүздөгөн адамдар урандылардын астында болушу мүмкүн», – деп жазды Tolo News.
Европалык Жер Ортолук деңиз сейсмология борбору (EMSC) кабарлагандай, жер титирөөнүн магнитудасы 6,2 болуп, очогу Джелалабад шаарынан 57 чакырым түндүк-чыгышта, 35 чакырым тереңдикте орун алган.
Кийинчерээк EMSC маалыматты тактап, эпицентрдин Джелалабадга чейинки аралыкты 50 чакырымга, очогунун тереңдигин 10 чакырымга өзгөрткөн. Ал эми АКШнын Геологиялык кызматы (USGS) аралыкты 27 чакырым, тереңдикти 8 чакырым, магнитуданы болсо 6,0 деп баалады.

















