Деңизге чыгуу жолу жок болгондуктан, Афганистан акыркы жумаларда Пакистан менен чек арасы бир нече жолу жабылгандыктан пайда болгон чыңалуунун фонунда, бул өлкөгө болгон көз карандылыкты азайтуу максатында соода жолдорун Иран жана Борбор Азия аркылуу көбүрөөк колдоно баштады.
Reuters жазгандай, расмий адамдардын айтымында, Афганистандын Пакистандын портторуна болгон көз карандылыгы Пакистанга чек аранын аркы бетинде жашынып жүргөн пакистандык жоочулар маселеси боюнча Кабулга басым жасоого көптөн бери мүмкүнчүлүк берип келген.
Бирок Афганистан жүктөрдү Индия колдогон Чабахар портуна жеткирүү үчүн барган сайын Ирандын кызматтарын көбүрөөк колдонуп, Пакистандан айланып өтүү жана чек арадагы кайталанып турган үзгүлтүктөрдөн качууга аракеттенүүдө.
«Акыркы алты айда Иран менен болгон соода көлөмүбүз 1,6 млрд долларга жетти. Бул Пакистан менен болгон 1,1 млрд долларлык соода көлөмүнөн жогору», — деди агенттикке Соода министрлигинин өкүлү Абдул Салам Джавад Ахундзада.
«Чахбахардагы объектилер кечеңдөөлөрдү азайтты жана чек аралар жабылып калган учурда жеткирүүлөр токтобойт деген ишенимди соодагерлерге берди», — деп кошумчалады ал.
Ахундзаданын айтымында, Иран заманбап жабдууларды жана рентген сканерлерин орнотуп, афган жүктөрү үчүн порттук тарифтерге 30% арзандатуу, сактоо төлөмдөрүнө 75% арзандатуу жана порттогу токтотуу акыларына 55% арзандатуу сунуштаган.
Соодагерлер Пакистан менен келишимин бүтүрүп, башка маршруттарга өтүп кетүү үчүн үч ай убакыт бар экендигин Афганистандын экономика боюнча вице-премьери мулла Абдул Гани Барадар билдирди.


















