Иран Ислам Республикасынын президенти Масуд Пезешкиан Пакистандын борбору Исламабад шаарына келгенин “IRNA News” агенттиги маалымдады.
Пезешкиан баштаган Ирандын жогорку деңгээлдеги делегациясын “Нур Хан” аэропортунан Пакистандын президенти Асиф Али Зардари жана премьер-министри Шехбаз Шариф тосуп алышты.
Тосуп алуу аземине ошондой эле Иран Ислам Республикасынын Исламабаддагы элчиси Реза Амири Могаддам жана бир катар пакистандык расмий өкүлдөр дагы катышышты.
Сапардын максаты – АКШ менен Ирандын ортосундагы тынчтык меморандумуна кол коюлгандан кийинки уланып жаткан дипломатиялык жөнгө салууну талкуулоо болуп саналат.
Тараптар Тегеран менен Вашингтондун ортосундагы жакында Швейцарияда өткөн сүйлөшүүлөрдүн жүрүшүндө макулдашылган 60 күндүк жол картасын ишке ашырууну талкуулоону пландаштырууда. Президент Пежешкиан анын максаты “меморандумдун бардык пункттарынын толук аткарылышын камсыз кылуу” экенин белгиледи.
Саясий күн тартибинен тышкары, сапар Иран менен Пакистандын ортосундагы мамилелерди чыңдоого багытталган. Жолугушууларда соода, энергетика, чек ара кызматташтыгы жана аймактык байланыш сыяктуу тармактарды камтыган экономикалык кызматташтыкты кеңейтүү келечеги талкууланат деп күтүлүүдө.
Иран президенти премьер-министр Шехбаз Шариф жана президент Асиф Али Зардари, ошондой эле Пакистандын башка жогорку даражалуу расмий өкүлдөрү менен жолугушат деп күтүлүүдө.
Пакистан Катар менен бирге Иран менен АКШ ортосундагы сүйлөшүүлөргө ортомчулук кылууда.
Сүйлөшүүлөрдүн биринчи айлампасы 21-июнда Швейцариянын Бюргеншток шаарында өттү. Сүйлөшүүлөрдөн кийин Пакистандын премьер-министри Шехбаз Шариф Бюргенштокто өткөн Иран менен АКШнын ортосундагы сүйлөшүүлөрдүн жыйынтыктарын жогору баалап, аларды кубаттандыруучу деп атаган.
