Россияда онкологиялык ооруларды дарылоо үчүн жаңы препарат пайда болот. Россиянын Р-Фарм компаниясы Индиянын Dr. Reddy’s менен торипалимаб аттуу моноклоналдык антителолорго негизделген дарыны рынокко чыгаруу боюнча келишим түздү. Бул препарат биринчи жолу Junshi Biosciences тарабынан Кытайда сегиз жыл мурда катталган.
Бул дары рак ооруларынын ар кандай түрлөрүн, анын ичинде кызыл өңгөч (пищевод) жана мурун-жуткурук (носоглотка) рагын дарылоодо колдонулат. Эгер торипалимаб клиникалык сунуштарга жана жашоо үчүн маанилүү дары-дармектердин тизмесине кирсе, анда ал Россия рыногунда өндүрүүчүлөргө жылына 5–10 млрд рубль киреше алып келиши мүмкүн.
Келишимге ылайык, даяр дары формасын өндүрүү «Р-Фармдын» өндүрүш базасында локалдаштырылат. Препаратты Россияда каттоо 2027-жылы күтүлүүдө.
«Р-Фарм» компаниясы 2002-жылы Алексей Репик тарабынан негизделген. 2025-жылдын жыйынтыгында компаниянын кирешеси 168,2 млрд рублга жетип, 14,1% өскөн, ал эми таза пайдасы 13,3 млрд рубль болуп, 26,7% көбөйгөн.
Ал эми Dr. Reddy’s компаниясы 1984-жылы Индияда негизделген. 2025-жылы анын кирешеси 35 млрд рублга жетип, 15,8% өскөн, таза пайдасы 688,3 млн рубль болгон.
Торипалимаб — бул иммундук жооптун «контроль чекиттеринин ингибиторлору» классына кирген инновациялык моноклоналдык антитело. Ал иммундук терапия катары ар кандай залалдуу шишиктерди, анын ичинде сейрек кездешүүчү түрлөрүн дарылоодо колдонулат.
Бул препарат 2018-жылы Кытайда катталган, ал эми 2023–2024-жылдары АКШнын FDA жана Европанын EMA тарабынан да жактырылган. Dr. Reddy’s бул препаратты лицензия боюнча колдонууда.
Иммундук онкология — фармацевтика тармагындагы эң тез өнүгүп жаткан жана келечектүү багыттардын бири. 2025-жылы онкологиялык ооруларды дарылоодо колдонулган моноклоналдык антителолордун жалпы сатуу көлөмү 200 млрд рублга жетип, 20% өскөн.
Эксперттердин айтымында, Россияда мындай препараттар рыногу али толук каныккан эмес, жаңы дарыларга суроо-талап жогору бойдон калууда.
Торипалимабдын Россиядагы негизги атаандаштары катары Китруда, Опдиво, Либтайо жана Джемперли аталат. Ошондой эле Арейма препараты да бар, ал Кытайда иштелип чыгып, Россияда 2024-жылы катталган жана маанилүү дары-дармектер тизмесине кирген.
Дарыгерлердин маалыматына ылайык, кызыл өңгөч рагы онкологиялык оорулардын 3%ын, ал эми мурун-жуткурук рагы 1%ын түзөт. Эксперттердин пикиринде, торипалимабдын ийгилиги анын клиникалык сунуштарга жана маанилүү дары-дармектер тизмесине киргизилишине түздөн-түз байланыштуу болот.



















