Азербайжандын тышкы иштер министри Жейхун Байрамов ирандык кесиптеши Аббас Аракчиге Азербайжандын аймагы Иранга каршы колдонулбай турганын билдирди.
Бул тууралуу Азербайжандын Тышкы иштер министрлигинин басма сөз кызматы маалымдады.
Бейшемби күнү Жейхун Байрамов менен Аббас Аракчинин ортосунда телефон аркылуу сүйлөшүү болду.
Сүйлөшүүнүн жүрүшүндө Ирандын айланасындагы кырдаал талкууланды. Байрамов аймактагы акыркы чыңалуу тынчсыздануу жаратканын белгилеп, Азербайжан ар дайым Иранда жана анын айланасында туруксуздукка алып келиши мүмкүн болгон кадамдардан жана риторикадан бардык тараптардын кармануусун жактап келгенин баса белгиледи.
Ошондой эле, бар болгон көйгөйлөр эл аралык укуктун нормалары жана принциптерине ылайык, диалог жана дипломатия жолу менен гана чечилиши керектиги айтылды.
Байрамов Азербайжан эч качан өзүнүн аба мейкиндигин же аймагын коңшу Иранга же башка бир да өлкөгө каршы аскердик операцияларды жүргүзүү үчүн колдонууга жол бербей турганын өзгөчө белгиледи.
Азербайжандын Тышкы иштер министрлигинин маалыматына ылайык, телефондук сүйлөшүүдө ошондой эле эки тараптуу жана регионалдык, өз ара кызыкчылык жараткан башка маселелер боюнча да пикир алмашуу болду.
Ирандын ТИМ башчсысы күн мурун ошондой эле аймактагы өлкөлөр менен дипломатиялык консультацияларды улантып, Катар, Египет, БАЭ, Пакистан, Оман жана Түркиядагы кесиптештери менен телефон аркылуу сүйлөшүп, аймактык жана эл аралык акыркы окуяларды талкуулады.
Аракчи Батыш Азиядагы кырдаалдын сезимталдыгына токтолуп, Ирандын акыркы окуялар боюнча позициясын түшүндүрдү.
Сүйлөшүүлөрдүн жүрүшүндө тараптар учурдагы кырдаалды жоопкерчилик менен башкаруу жана учурдагы окуялардын аймактык коопсуздукка тийгизген кесепеттерине көңүл буруу зарылдыгын баса белгилешти.
















