Иран АКШга, Израил режимине жана бир катар террордук топторго каршы улуттук коопсуздугуна каршы багытталган бузукулук аракеттерди колдогону жана каржылаганы үчүн эл аралык аянтчаларда жарандык жана кылмыш иштери боюнча доолорду бергенин билдирди.
Айыпталуучулар өлкөнүн коопсуздугун солгундатууга багытталган башаламандык иш-аракеттерди жана саботаж актыларын колдоого түздөн-түз катышкан деп көрсөтүлүүдө.
Сырттан шыкак берилген башаламандыктар Иранда 8-январда күчөп, иран базарларында жана соода жайларында өткөн тынч нааразылык акцияларынан кийин бир нече күнгө созулган. Ал акцияларда соодагерлер өкмөттү иран риалынын арзандашын токтотууга чакырышкан.
Израил режими жана АКШнын президенти Дональд Трамп ачык колдогон зомбулук мамлекеттик жана жеке менчикке олуттуу зыян алып келип, дүкөндөрдүн, мамлекеттик мекемелердин, коомдук тейлөө объекттеринин кеңири кыйрашына, ошондой эле миңдеген жайкын тургундардын, анын ичинде аялдар менен балдардын жана коопсуздук күчтөрүнүн кызматкерлеринин каза болушуна себеп болгон.
Иран бийлиги АКШнын жана Израилдин атайын кызматтары башаламандыктарга катышкан адамдарды жана көчөлөрдө аракеттенген куралдуу террористтерди каржылоого, окутууга жана маалыматтык жактан колдоого түздөн-түз катышканын тастыктады.
Ирандын сот бийлигинин башчысы Голам-Хоссейн Мохсени-Эджеи да АКШ менен Израилди акыркы массалык башаламандыктардын негизги күнөөкөрлөрү деп атап, алар бул окуяларда кыйыр гана эмес, ачык жана түз роль ойногонун белгиледи.
Жакында болгон башаламандыктарга тиешеси бар адамдардын иштерин кароого арналган жыйында ал соңку толкундоолор маалында «кылмышкер Америка» жана «сионисттик режим» террористтерге жана башаламандыкка катышкандарга каржылык, аскердик жана окутуу колдоосун ачык көрсөткөнүн айтты. Анын кошумчалашынча, бул окуяларды 12 күндүк согуштун кезектеги этабы катары кароого болот.
Мохсени-Эджеи ошондой эле көчөлөрдө жана коомдук жайларда кол салууларды жасаган, жайкын тургундарды жана коопсуздук күчтөрүн аткылаган, оор кылмыштарды жасаган адамдар АКШ менен Израилдин Ирандын ичиндеги кутумдарын ишке ашырууну көздөгөн кылмышкерлер болгонун белгиледи.
Ал коопсуздук кызматкерлерин жана жайкын тургундарды өлтүрүүгө катышкандарга эч кандай ырайым болбой турганын кошумчалады.
Сот бийлигинин башчысы башаламандыктарга катышкан бардык адамдар жоопкерчиликке тартылышы жана мамлекеттик жана жеке менчикке келтирилген зыяндын ордун толтурушу керектигин баса белгиледи.
«Башаламандыктарга тиешеси бар адамдар — уюштуруучулар болобу, шыкакчылар, провокаторлор же түздөн-түз аткаруучулар болобу — мыйзамда каралган жазаны гана тартып тим болбостон, мамлекеттик жана жеке менчикке келтирилген зыянды да толук өндүрүп берүүгө тийиш», — деди ал.















