Камбоджа менен Таиланд ок атышууну токтотуу келишимине карабастан, эки өлкөнүн аскерлери чек араларындагы бири-биринин позицияларына кол салууну улантууда. Натыйжада кагылышуулар кайра башталгандан бери таиланддык 39 адам каза тапса, Камбоджа тараптан 18 жай тургун набыт болгон.
Бул тууралуу Bangkok Post гезитине шилтеме берип INTERFAX.RU басылмасы жазды.
“Таиланддын кургактагы күчтөрүнүн басма сөз катчысынын орун басары Рича Суксуванон эки өлкөнүн армиялары бир нече талаштуу аймактарды көзөмөлгө алуу аракетинде бири-бирине ракеталык артиллерия менен ок чыгарып жатканын билдирди”,- деп айтылат маалыматта.
Рича Суксуванон Таиланд аскерлери эки өлкөнүн 800 километрден ашык чек арасындагы 19 негизги пункттун төртөөнү кармап турганын белгилеп, Сурин провинциясындагы Та Квай храм комплексинин урандылары үчүн олуттуу салгылашуулар болгонун кошумчалады.
Таиланд ошондой эле Камбоджаны турак-жай аймактарын аткылады деп айыптады. Өлкөнүн Коргоо министрлигинин өкүлү Сурасант Конгсири шаршемби күнү Камбоджа аскерлери Сакэу провинциясындагы жарандарды 120 BM-21 ракетасы буталарга атканын белгиледи.
“Nation Thailand” гезити жарыялаган Таиланд армиясынын билдирүүсүнө негизделген жаңылыктарга ылайык, кагылышуудан дагы төрт жоокер каза болуп, каза болгон жоокерлердин жалпы саны 39га жетти.
Khmer Times гезитинин маалыматы боюнча, Камбоджанын Ички иштер министрлиги эки өлкөнүн ортосундагы уланып жаткан чек арадагы чыр-чатактардын гуманитардык жагына токтолгон билдирүү жарыялады.
“Кагылышуулар кайра башталгандан бери каза болгондордун саны 18 жай тургунга жетип, 78 адам жаракат алган. Ал эми болжол менен 450 000 камбоджалык, анын ичинде болжол менен 240 000 аял жана 130 000 бала үйлөрүнөн качууга аргасыз болгон”,- деп айтылат билдирүүдө.
Эскерте кетсек, Таиланд менен Камбоджа бир кылымдан ашык убакыт мурун Франция Камбоджаны басып алгандан кийин эки өлкөнүн чек аралары аныкталганга чейинки чек ара талаш-тартышта келе жатат.
Чек аранын узундугу 817 километр, түндүк-чыгыштагы Лаос чек ара өтмөгүнөн түштүктөгү Таиланд булуңуна чейин созулат.
Биринчи кагылышуу 2008-жылы, Камбоджа талаштуу аймакта жайгашкан XI кылымдагы ибадаткананы ЮНЕСКОнун Дүйнөлүк мурастар тизмесине каттоого аракет кылганда болгон.



















